U shkarkua nga liderët e Kosovës me dyshimet për lidhje serbe, Rama e propozon për kreun e Shërbimit Informativ Shqiptar

Kryeministri Edi Rama zhvilloi një takim me Presidentin Bajram Begaj ku i propozoi emrin e ri për drejtimin e Shërbimit Informativ Kombëtar. Nëpërmjet një statusi në profilin e tij në “Facebook”, Rama bëri me dije se ka propozuar emrin e Vlora Hysenit.

Kryeministri shkroi se zonja Hyseni përbën garanci për reformimin e mëtejshëm të shërbimit inteligjent shqiptar. 

Ndërkohë Vlora Hyseni më herët është shkarkuar nga Presidentja e Kosovës, Vjosa Osmani dhe kryeministri Albin Kurti nga pozita e zëvendësdrejtores së Agjencisë së Kosovës së Inteligjencë.

Ajo ishte në krye të institucionit më të lartë të sigurisë dhe inteligjencës që nga dhjetori i vitit të kaluar, kur ishte shkarkuar drejtori Kreshnik Gashi, deri në prill të këtij viti, kur në detyrën e drejtorit u emërua Petrit Ajeti.

Në shkurt të vitit 2019, Vlora Hyseni ishte emëruar zëvendësdrejtoreshë në Agjencinë e Kosovës për Inteligjencë. Gjithashtu ka qenë drejtoreshë për marrëdhënie me jashtë në AKI.

Ajo u shkarkua nga posti nga presidentja Vjosa Osmani dhe kryeministri Albin Kurti.

Zyrtarisht nuk u dha arsyeja, por pati spekulime në media për lidhje të Hysenit me serbët.

"Vendimi për shkarkim e obligon znj. Vlora Hyseni të bëjë dorëzimin e të gjitha mjeteve dhe materialeve me të cilat ka qenë e ngarkuar. Gjithashtu, znj. Vlora Hyseni, sipas vendimit, obligohet që të ruajë të gjitha informacionet që ka marrë gjatë ushtrimit të detyrës, pavarësisht sesi i është dhënë qasja në to apo si i ka pranuar ato, apo në çfarëdo forme tjetër ka arritur të posedoj informacione të klasifikuara”, thuhej në njoftimin zyrtar.

Ajo mbulonte marrëdhëniet e Kosovës me Serbinë në AKI dhe njihet si njeri i Hashim Thaçit.

POSTIMI I PLOTË

Sot i paraqita Presidentit të Republikës propozimin për emërimin e Znj.VLORA HYSENI drejtore e Shërbimit Informativ Kombëtar, me besimin e plotë se përgatitja e spikatur, eksperienca e krijuar në vite dhe respekti që zonja Hyseni gëzon në komunitetin ndërkombëtar të inteligjencës, përbëjnë një garanci të plotë për reformimin e mëtejshëm të shërbimit inteligjent shqiptar.