Kur qeveria del në terren… për problemet që i krijoi vetë

Politiko.al

Pas 12 vitesh qeverisje, Tirana vijon të jetë një zonë kaosi urban. Në vend që të zgjidhen problemet reale, kryeministri Rama dhe kabineti i tij u mblodhën për të ndarë punë me ministrat dhe deputetët si në një lojë strategjie.

Hapësira publike, parkingjet dhe shërbimet mbeten të pakta e të papërballueshme, por mobilizimi i radhës ka vetëm një synim: takime, raportime dhe premtime boshe.

Në terren, qytetarët vazhdojnë të vuajnë ndërkohë që në zyrat rozë vazhdojnë të planifikojnë… mbledhje të tjera.

Në një takim një orësh të zhvilluar në selinë rozë, Rama ka ndarë detyrat për përfaqësuesit e institucioneve qendrore dhe lokale që do të angazhohen drejtpërdrejt në menaxhimin e problematikave në Tiranë.

Plani parashikon ndarjen e territorit në blloqe, me përgjegjësi të qarta për secilën zonë. Këto blloqe do të mbikëqyren nga deputetë, ministra dhe përfaqësues të Bashkisë së Tiranës, të cilët pritet të punojnë në koordinim të ngushtë për çështjet prioritare.

Sipas burimeve, katër janë pikat kryesore ku kërkohet mobilizim i veçantë: hapësirat publike, parkingjet, shërbimet dhe lejet e ndërtimit.

Roli i ministrave do të zgjerohet, me synimin që të ndërhyjnë konkretisht në rastet ku problematikat lidhen me fushat e tyre përkatëse.

Ministria e Financave do të merret me çështjet buxhetore, ndërsa Ministria e Infrastrukturës do të ndihmojë në problematikat e ujësjellësit apo transportit.

Për menaxhimin e hapësirave publike, do të angazhohen kryetarja e komanduar e Bashkisë së Tiranës, Anulea Ristani dhe ministrja e Arsimit dhe Sportit, Ogerta Manastirliu.

Trafiku dhe problematikat që lidhen me qarkullimin do të jenë në fokus të ministrit të Ekonomisë, Kulturës dhe Inovacionit, Blendi Gonxhja dhe atij të Brendshëm, Ervin Hoxha.

Ndërkohë, burimet njerëzore të bashkisë do të jenë nën kujdesin e ministrit për Pushtetin Vendor, Arbjan Mazniku dhe Anulea Ristanit. Me financat do të merren ministri Petrit Malaj dhe ministrja e Shtetit për Sipërmarrjen dhe Klimën e Biznesit, Delina Ibrahimaj.

Rama u ka kërkuar deputetëve dhe ministrave të zhvillojnë takime të drejtpërdrejta me qytetarët dhe të raportojnë për ecurinë. Takimi i radhës për të diskutuar mbi progresin është caktuar të mbahet pas dy javësh.