Listat e PS sjellin “përçarje”, anëtarja e Këshillit Bashkiak Shkodër braktis Ramën: S’jemi tufë delesh

Listat për Këshillat Bashkiakë kanë sjellë pakënaqësi në PS. Pas dorëheqjes së kreut të PS-së në Rubik, Pal Tushaj, edhe këshilltarja aktuale e Bashkisë së Shkodrës, Tereze Brigja, ka njoftuar dorëheqjen.

Në një mesazh drejtuar kolegëve në ËhatsApp, Brigja shprehet se Shkodrës po e drejton injoranca dhe mediokriteti. Teksa thotë se kjo nuk është PS për të cilën ajo ka kontribuar prej vitesh, Brigja shkruan se drejtuesit socialist në Shkodër e kanë braktisur prej kohësh Dukagjinin, e megjithatë në kohë fushate kërkojnë vota prej tyre.

Brigja e mbyll duke thënë se “Shkodra nuk është një tufë delesh që bariu idiot e çon ku t'i dojë qejfi”.

Mesazhi i Tereze Brigjajt:

Përshëndetje kolegë !

Dëshiroj të jeni mirë familjarisht !

Ju bëj me dije se largohem nga PS e Shkodrës të cilën e drejton injoranca dhe mediokriteti përfshij këtu edhe deputet apo ish-deputet . Kjo nuk është partia për të cilën kam kontribuar prej vitesh...

Unë jam dukagjinase dhe ndihem krenare për vendlindjen dhe prejardhjen time. PS e Shkodrës i ka përbuzë dhe masakruar dukagjinasit duke i lënë pa rrugë, pa drita e pa shërbimet minimale, me qellim që ata të largohen nga trojet e veta e të shpërndahen nëpër botë.

Me këtë strategji kanë menduar se e zhdukun "farën" e dukagjinasit...

Ku kanë moral apo fytyrë drejtuesit e PS Shkoder të kërkojnë vota në Dukagjin, në një kohë kur në këshillin bashkiak këtë komunitet nuk e përfaqëson askush. Nuk besoj se dukagjinasi tenton të hapin një derë të mbyllur, se ai që e bën një gjë të tillë nuk është dukagjinas.

Ku kanë moral apo fytyrë drejtuesit e PS Shkoder të kërkojnë vota te KATOLIKËT e Shkodrës kur injorojnë dhe tallen me bësimin e tyre. Përfaqësimi i këtij komuniteti në këshillin bashkiak të Shkodrës është i papërfillshëm (nga numri rendor 1- 13 nuk ka asnjë katolik).

Si kontribuojnë këta drejtues idiotë në harmoninë fetare? Si munden këta idiotë t'i zëvendësojnë vlerat me antivlerat? Nuk janë mediokër, as grek as italian katolikët e Shkodrës, por janë shqiptarë.

Këto poshtërsi e shumë të tjera si këto e kanë çuar dhe po e çojnë Shkodrën nga humbja në humbje. Shkodra nuk e meriton këtë... Shkodra nuk është një tufë delesh që bariu idiot e çon ku t'i dojë qejfi.