Mbyllja e shkollës private turke “Mehmet Akif Ersoy”, Kushi sqaron vendimin: Nuk plotësuan kriteret ligjore

Këshilli i Ministrave vendosi të mbyllë dje shkollën jopublike turke”Mehmet Aif Ersoy”. Ministrja e Arsimit Evis Kushi pasqaruar arsyet e mbylljes së shkollës private në këtë fillim viti shkollor.

Përmes një postimi në Facebook, Kushi shkruan se ka pasur një sërë shkeljesh të legjislacionit në fuqi nga zotëruesit e licensës së shkollës. Sipas ministres, procesi mësimor për periudhën 2022-2023 ka nisur të zhvillohet në një godinë të pamiratuar nga MAS.

Më tej Kushi shtoi se zotëruesit e licensës nuk kanë plotësuar kriteret ligjore dhe në kushte të tilla bëhet revokimi i licencës. Shkolla jopublike “Mehmet Akif Ersoy”ishte hapur në Tiranë prej 26 vitesh.

SQARIM PËR OPINIONIN PUBLIK

Nisur nga interesimi dhe spekullimet në lidhje me shkaqet që çuan në heqjen e licencës dhe mbylljen e shkollës jopublike “Mehmet Akif Ersoy”, sqarojmë se ky vendim është rezultat i konstatimit nga Ministria e Arsimit dhe Sportit të një sërë shkeljeve të legjislacionit në fuqi nga zotëruesit e licencës në fjalë.

1. Kanë filluar procesin mësimor 2022-2023 në një vendndodhje dhe mjedise të tjera, të pamiratuara nga MAS, pra pa certifikimin ligjor përkatës të standardeve të godinës.

2. Nuk i kanë plotësuar më tej kriteret ligjore edhe pse nga ana MAS është kryer dy herë verifikimi i tyre.

3. Në kushtet e ushtrimit të veprimtarisë jashtë kritereve përkatëse licenca duhet të revokohet.

Ministria e Arsimit dhe Sportit në çdo rast ka përgjegjësinë për garantimin e standardeve, sigurisë dhe mirëqenies së nxënësve. Prandaj, në respekt të ligjit dhe në mbështetje të 160 nxënësve dhe të familjeve të tyre, do të marrë të gjitha masat e nevojshme për të transferuar nxënësit në shkolla që përmbushin kriteret dhe standardet e funksionimit.

Ndërkohë Ministria e Arsimit dhe Sportit nënvizon se revokimi i licencës në fjalë nuk ka asnjë lidhje me spekullimet e ndryshme rreth shkaqeve të këtij vendimi.

Gjithashtu, Ministria e Arsimit dhe Sportit sqaron të gjithë të interesuarit për këtë çështje, se në këtë fillimviti shkollor nuk janë vënë re raste të tjera shkeljesh të së njëjtës natyrë dhe kriteret e standardet ligjore janë të përmbushura për të gjithë nxënësit e tjerë të shkollave jopublike.