Rama mohoi në RAI3 njohjen me Luftar Hysën, gazetarët shqiptarë i sulmonte: Nuk jetoj për të jashtënxjerrë

Në një intervistë të publikuar dje për gazetarin italian Giorgio Mottola, kryeministri Edi Rama ka mohuar njohjen me Luftar Hysën, biznesmeni shqiptar i lidhur me kartelin Sinaloa.

Për RAI3, Rama tha se nuk e njihte Hysën  dhe se nuk dinte asgjë për koncesionin që atij i ishte dhënë “Valona Construction” një kompanie guacke të Hysës.

"Unë as që e di kush është, në rregull? Nuk e di as kush është. Kam takuar njerëz, e përsëris, shumë njerëz, shqiptarë që ikin e vijnë, që duan të takohen, të shohin, me miq e me të tjerë. U thuhet, “në rregull, ejani, çfarë do bëni, si do e bëni”, etj. Megjithatë, fakti që një person edhe në qeveri apo një person që vjen nga jashtë, del nesër që është i kalbur nuk më bën mua përgjegjës që e kam takuar atë apo kam takuar dikë tjetër. Pra, kjo është mënyra sesi bëhet një gazetari që bën pis, që bën pis", tha Rama. 

Gjithësesi nuk është e para herë që kryeministri pyetet për lidhjet me biznesmenin Hysa. 

Rama është pyetur dy vjet më parë gjatë një bashkëbisedimi online me gazetarët lidhur me një takim që ai ka zhvilluar me tre persona të cilët, sipas mediave meksikane, kanë pasur kartelin e drogës Sinaloa.

Kjo çështje duket se nuk i ka pëlqyer kryeministrit, i cili ka “lëshuar gojën” duke i hedhur poshtë të gjitha pretendimet.

“Ju kam lënë Zotin, nuk jetoj për të ngrënë dhe për të jashtënxjerrë” – u drejtohet Rama mediave.

Asokohe në mediat shqiptare qarkullonte lajmi i një gazete meksikane për katër vëllezër shqiptarë të lidhur me kartelin e Sinaloas që po pastron paratë në Shqipëri.

Njëri prej emrave të lakuar ishte Luftar Hysa, i cili sipas disa mediave 4 vite më parë u fotografua në Kryeministri.

Ai ka mohuar të gjitha pretendimet e ngritura nga mediat meksikane. Në të njëjtën linjë ishte edhe kryeministri Edi Rama.

“E para nuk besoj se ka ndonjë dallim mes medias në fjalë meksikane dhe tuajës, se mund të thuhen të vërteta dhe shumë të gënjeshtra.

Unë e konsideroj të neveritshme që me një copë letër që del diku, një artikull që del diku merret një familjet e tërë dhe kryqëzohet pa e pyetur fare, kush jeni, ku jeni dhe me çfarë merreni.

Dhe pastaj lidhet njeriu më i kërkuar në botë dhe lidhet me një hotel me më pak se 100 dhoma në Vlorë. Nuk e di si bëhen këto pa asnjë kërkim dhe verifikim.

Kap emra, përplasi pas murit. Ju qofshi dhe Zoti ju pastë nën kujdes juve që merreni me këtë sport. Unë nuk njoh ndonjë kartel, nuk kam lidhje me asnjë aktivitet ilegal.

Nuk jetoj për të ngrënë më shumë dhe jashtënxjerrë sa më shumë, por për disa arsye të tjera.

Ju kam lënë Zotin atyre që ndërtojnë të tilla fabula, jo vetëm për mua, por për të gjithë ata që përfshihen në këto sulme dhe goditje që shkatërrojnë jetë njerëzish.

Doli një artikull atje dhe mbushet gjithë rrjeti i kanaleve të vatanit këtu me një llumhane që nuk di si i bëhet për ta frenuar” tha ai.