Nga shpronësimet, fondi për vaksinat te restaurimi i godinës së Maks Velos, vendimet që mori sot qeveria

Këshilli i Ministrave u mblodh sot për të marrë disa vendime, të cilat i njoftuan përmes një deklarate për mediat nga kryeministria.

I pari që mori fjalën ishte ministri i Brendshëm Bledi Çuçi, i cili njoftoi vendimin e shpalljes "Dëshmor i Atdheut" të nënkomisarit të Lezhës, Saimir Hoxhës.

Ndërsa ministrja e Infrastrukturës dhe Transportit, Belinda Balluku bëri me dije janë marrë një sërë vendimesh në lidhje me shpronësimet. Ajo tha se janë bërë shpronësime për të vijuar punimet në unazën lindore të qytetit të Kavajës dhe unazën e Korçës.

Një tjetër shpronësim është bërë në një zonë, ku pritet të kalojë TAP. Ministrja bëri me dije se është marrë vendimi që një godinë 6 katëshe në Tiranë e arkitektit Maks Velo duhet ruajtur dhe kthyer në identitet.

“Ministria e Infrastrukturës dhe Energjisë ka depozituar disa projektvendime, sidomos shpronësime. Shpronësim për të vazhduar punimet në unazën lindore të qytetit të Kavajës. Gjithashtu kemi aprovuar sot, vazhdimin për shpronësimin e punimeve në unazën e Korçës, kjo rrugë krijohet jo vetëm për trafikun, por për t’u dhënë akses qytetarëve.

Dua të përmend këtu dhe vendimin që kemi marrë për shpronësimin e një zone që ka kaluar për TAP. Në të ardhmen ajo do të luajë një rol të rëndësishëm, sepse do të jetë TAP pjesë e projektit që kemi nisur. Ne kemi hedhur hapat për TEC-in e Vlorës. Ndërkohë, gjithashtu kemi bërë shpronësimin e një sheshi në fshatin e Bogës.

Një shpronësim i rëndësishëm është një godinë 6-katëshe mes Rrugës së Dibrës e Rrugës së Barrikadave e arkitektit Maks Velo e fillimit të viteve ’70, por që gjatë tranzicionit ka pasur shtesa të paligjshme, ka pasur ndërhyrje në strukturë që është një vepër akitekturore që e konsiderojmë të rëndësishme dhe që duhet ruajtur”, tha Balluku.

Ministrja e Shëndetësisë Ogerta Manastirliu bëri me dije se është marrë vendimi për kryerjen e pagesës për mbi 500 vaksina Pfizer, që pritet të vijnë brenda vitit. Ajo bëri me dije se kostoja është 6 milionë dolalrë, ndërsa shtoi se vendi ynë ka siguruar më shumë se 2 milionë doza.

“Vendim i për kryerjen e pagesës për mbi 500 mijë doza të vaksinës Pfizer që do të vijnë deri në dhjetor, që do i shtohen programit të vaksinimit, përmes këtij akti bëhet i mundur pagesa prej 6 milionë dollarë për të gjithë këto doza që do të plotësojnë nevojat. Ne kemi garantuar deri më tani sigurimin për plotësimin e nevojave përmes një portofoli të diversifikuar dhe deri më tani kanë mbërritur më shumë se 2 milionë doza vaksine dhe 1.7 milionë janë kryer”, tha ajo.

Sakaq ministri i Drejtësisë bëri me dije se Shqipëria do të nënshkruajë një marrëveshje me Spanjën për ekstradimet. Tashmë, shtoi Manja nuk ka pengesa ligjore për ekstradimin e personave që kanë kryer krime mes dy vendeve.

"Sot në Këshillin e Ministrave i hapëm rrugë marrëveshjes mes Spanjës e Shqipërisë për ekstradimet. Nëpërmjet kësaj marrëveshje të re me Spanjën. Eliminojmë një pengesë ligjore mes dy vendeve, që ka të bëjë me rezervën ligjore me të cilën Shqipëria ka ratifikuar për moslejimin e shtetasve shqiptarë drejt Spanjës dhe anasjelltas. Eliminohet kjo. Me Spanjën, autoritetet tona gjyqësore do të lejojnë ekstradimin e shqiptarëve drejt Spanjës dhe anasjelltas", tha Manja.

Ministrja e Arsimit Evis Kushi tha se vendimi për të zhvilluar mësim me turne dhe në orare të reduktuara nuk mund të zgjasë gjatë gjithë vitit. Ajo tha se gjithçka është në varësi të situatës epidemiologjike.

"Dua t’i qetësoj prindërit duke iu thënë që ky nuk është vendim definitiv që do zbatohet për gjithë vitin, por është sipas situatës. Komiteti i ekspertëve e vlerëson në një sistem javor, 2-javor dhe shumë shpejt do ketë një vendim tjetër, duke shpresuar që procesi i vaksinimit do na çojë drejt normalizimit.  87% e mësuesve sot janë të vaksinuar, 71% janë të vaksinuar me të dy dozat dhe pjesa tjetër pritet të marrin dozën e dytë.

Vendimi i parë ka të bëjë me disa ndryshime në VKM-në e vitit 2020 që lidhet me mbështetjen financiare për studentët e ekselencës që studiojnë jashtë nga fondi i ekselencës . Për shkak të situatës së pandemisë, në shumë universitete u aplikuan disa metoda vlerësimi ndryshe nga ato tradicionale, studentët merrnin vlerësim kalon, nuk kalon dhe jo me notë, ndërkohë që VKM përcakton një mesatare, kështu që për t’i mos penalizuar, shtuam dhe këto raste për situata të jashtëzakonshme.

Studentët ekselentë do të kenë mbështetjen tonë, jo vetëm për studimet, por edhe për punësimin e tyre. Vendimi i dytë lidhet me miratimit të memorandumit të bashkëpunimit në fushën e arsimit të lartë mes Shqipërisë dhe Spanjës. Objektivi ynë të bashkëpunojmë me universitetet prestigjioz", tha Kushi.