Rama sulm sërish gjyqtarëve për Ballukun: Duan pagë 9230 €/ muaj, po marrin kompetencat e kryeministrit

Kryeministri Edi Rama ka vijuar sërish sulmet ndaj gjykatësve dhe prokurorëve.

Në një postim në X, Rama shkruan se ata kanë marrë kompetencat e kryeministrit, presidentit dhe parlamentit kur vendosën pezullimin e zv.kryeministres Belinda Balluku dhe tani sipas tij kërkojnë rritje page me 3100 euro.

Ai thekson se nuk e ka hallin tek një ministër, duke nënkuptuar Belinda Ballukun, po sipas tij tek rreziku real i përmbysjes së balancës demokratike mes pushteteve. 

Më datë 20 janar Gjykata Kushtetuese pritet te shqyrtojë kërkesën e magjistratëve për rritje page. 

Reagimi i Ramës:

“S’ka mundësi”, më shkruajnë disa, lidhur me kërkesën e gjyqtarëve për ta rritur pagën me 1600 Euro mbi aktualen!

Jo vetëm që ka mundësi, po 1600 Euro është rritja që kërkojnë magjistratët e këshilltarët e zakonshëm, se mes rritjekërkuesve janë edhe specialët, pra ata të GJKKO dhe SPAK-ut, të cilët kanë pagat më të larta në republikë, por kërkojnë edhe një rritje prej 3100 Eurosh!

Po, asnjë shaka, detin ku aktualisht marrin 6130 Euro në muaj, tani duan që t’ua kthejë në kos Gjykata Kushtetuese me 3100 Euro plus, e si përfundim të marrin 9230 Euro në muaj.

Si ka mundësi?!

Ka mundësi si jo, kur arrin të ndryshosh edhe qeverinë me një vendim gjykate, duke marrë kompetencat e kryeministrit, Presidentit e parlamentit bashkë, pa pasur marrë një kokërr vote të vetme nga populli tërë jetën tënde, si nuk arrike të marrësh nga arka e shtetit me një vendim tjetër gjykate, mijëra euro për të rritur pagën tënde?!

Kush ka mbetur pa e kuptuar që s’e kam hallin tek një ministër unë, po tek rreziku real i përmbysjes së balancës demokratike mes pushteteve?!