Rama kthen Shqipërinë në kamp refugjatësh nga Lindja e Mesme, firmos marrëveshjen me Italinë

Kryeministri Edi Rama ka firmosur sot një marrëveshje me Italinë që dukshëm e kthen Shqipërinë në një “kamp refugjatësh”.

Sipas kësaj marrëveshjeje Shqipëria do të strehojë refugjatët që mbërrijnë në Itali nga vendet e Lindjes së Mesme.

Sipas kryeministres italiane Giorgia Meloni ky pakt parashikon që në Shëngjin të ngrihet qendra për pritjen e refugjatëve që do të jetë nën juridiksionin e Italisë, dhe një tjetër strukturë do të ngrihet për akomodimin e tyre, deri sa të shqyrtohen kërkesat për azil, ndërsa Shqipëria do të kontribuojë vetëm me sigurinë. Kjo qendër parashikohet që të jetë gati në pranverën e ardhshme.

“Refugjatët, ata që kërkojnë azil do të mbeten në këto territore dhe do të seleksionohen midis atyre që kanë të drejtë dhe jo. Si për numër popullsie refugjatesh kemi një kapiencë 3000 persona sipas një regjimi të caktuar.

Flasim nëpërmjet flukseve dhe ky fluks në vit mund të arrijë deri në 36 mijë persona dhe që mund të alternohet si më pak ose më shumë dhe kjo marrëveshje nuk përfshin të miturit, gratë shtatëzanë dhe grupet e tjera vulnerabël. Juridiksioni i këtyre qendrave do të jetë italiane. Në portin e Shëngjinit, Italia do të angazhohet me procedurat e zbarkimit dhe të seleksionimit, do të realizohet një qendër e pritjes dhe të screening dhe do të ketë një strukturë tjetër që janë në vazhdimësi të kësaj strukturës së parë  të parë të screening. Pastaj pjesa shqiptare do të merret me gatishmërinë e observimit dhe ky protokoll që firmosim sot ka një kornizë politike dhe juridike të bashkëpunimit tonë.

Pastaj marrëveshje të tjera do të ndjekin më pas. Në lidhje me këtë lloj bashkëpunimi, kemi qellim që të jetë operative në pranverën e ardhshme”, tha Meloni.

Nga ana tjetër, kryeministri Rama tha se Shqipëria ndihet e obliguar që kur Italia thërret për ndihmë, vendi ynë duhet të përgjigjet.

“Nëse Italia thërret, Shqipëria përgjigjet. Nuk mund dhe nuk dua të gjykoj në meritën politike në lidhje me vendimet, por neve na takon të përgjigjemi gjithmonë të pranishëm kur mund të gjendemi për të ndihmuar, për të dhënë një ndihmesë dhe në këtë rast, do të thotë për të ndihmuar dhe për të menaxhuar me pak fare për te menaxhuar një situatë, për një situatë që është e vështirë për Italinë dhe e vërteta është që gjeografia, është kthyer në atë që quhet mallkimi për Italinë sepse kur hyhet në Itali zëre se ke hyrë ne Europë dhe në BE, por kur bëhet fjalë për të menaxhuar këtë hyrje si BE ne e dimë shumë mirë se si zhvillohen gjërat dhe mbi këtë sigurisht, ne nuk kemi forcën dhe kapacitetin për të qenë zgjidhja, por mendoj që kemi detyrën, angazhimin, obligimin dhe një kapacitet për të dhënë një ndihmë”, u shpreh Rama ndër të tjera.

Kujtojme se në gusht në 2021 Shqipëria pranoi  kërkesën e SHBA për strehimin e qindra afganëve në vendin tonë nga rrethet intelektuale dhe të grave aktiviste afgane, të cilët ishin nga të parët në listat e ekzekutimeve të barbarëve të Afganistanit.

Po ashtu, vendi ynë vazhdon të strehojë muxhahedinë të grupit MEK (Mojahedin-e-Khalq), të cilët ndodheshin në kampin Liria në Irak.

Muxhahedinët iranianë u strehuan në një kamp të posacem në Manzë që është ndërtuar me burimet financiare te vete muxhahedineve.