Flash News

Ditari i Maxhorancës

Rama në Fier: T’u ofrohet punë si roje apo teknik ish-pronarëve të tokave ku do ndërtohet spitali

Rama në Fier: T’u ofrohet punë si roje apo teknik

Është hapur ditën e sotme kantieri i spitalit rajonal të Fierit me financim nga qeveria turke. Kreu i qeverisë Edi Rama i shoqëruar nga ministret Belinda Balluku dhe Ogerta Manastirliut pa nga afër punimet.

Pa lënë mënjanë ironitë e tij, kreu i qeverisë i kërkoi inxhinierit të firmës turke që t’u ofroi punë ish-pronarëve të tokave sipas aftësive të tyre, roje, teknik apo punëtor në kantier.

“Unë kam një kërkesë që atyre familjeve që janë të shpronësuara t’i takosh që nga ai zotëria që unë fola atë ditë dhe t’i ofroni mundësinë që të mund të punojnë këtu duke pasur parasysh aftësinë e tyre, që nga roje kantieri, punëtor, teknik se nuk e di çfarë aftësish kanë. Dua t’i kontaktosh sot dhe t’i jepni mundësinë që të përfshihen”, tha Rama.

Ministrja e Infrastrukturës dhe Energjisë Belinda Balluku deklaroi se ka përfunduar faza e shpronësimit të 12 familjeve në truallin e të cilëve do të ngrihet spitali, ndërsa shtoi se përveç punonjësve nga Turqia do të ketë edhe punonjës vendas si dhe nga zonat përreth.

“Kemi nisur nga puna pas një jave punë përgatitore. Kemi mbyllur edhe fazën e shpronësimit me 12 familje që  ndodhen këtu. Procesi është mbyllur me sukses. Agjencia e Shpronësimeve ka bërë të gjithë procedurat. Kemi nisur nga puna për kantierin dhe deri ditën e hënë pritet që këtu të ketë mbi 200 punonjës dhe 20 inxhinierë që do të bëjnë gjithçka që duhet sa i përket logjistikës. Kemi marrë masat edhe për punonjësit. Një pjesë e mirë e tyre vijnë nga Turqia. Do ketë edhe punonjës vendas. Kemi nisur kontakte me kompani vendase dhe punonjës nga zonat këtu që kanë eksperiencë në ndërtim", tha Balluku.

Ndërsa, ministrja e Shëndetësisë Ogerta Manastirliu u shpreh se “Kemi përfunduar anën mjekësore.Është me të gjithë pajisjet mjekësore dhe të gjitha shërbimet. Do përshihen shërbimet e urgjencës dhe kirurgjisë si dhe do ketë departament special për kirurgjinë speciale".

Ditari politik

Të fundit