Rama “zapton” stadiumin e Kladissos në Kretë, Ambasada Shqiptare në Athinë “hap thesin” për kryeministrin

Kryeministri Edi Rama ka njoftuar se më 29 Mars do të jetë në Kretë të Greqisë, ku do të zhvillojë një takim me shqiptarët në kuadër të zgjedhjeve parlamentare të 11 majit.

Pas Athinës dhe Selanikut, në maj dhe nëntor 2024, ai mbërrin në Kretë më 29 mars për të mbajtur një fjalim në stadiumin e mbyllur Kladissos në orën 18:00 në Kretë.

“Me shqiptarët e Greqisë dhe të botës me vete, fitorja për Shqipërinë 2030 do të jetë e thellë”, ka njoftuar Rama para disa ditësh.

Kërkesa për dhënien me leje  të hapësirës është dorëzuar nga Ambasada Shqiptare në Athinë pranë autoritetit bashkiak dhe është miratuar unanimisht nga këshilli bashkiak, shkruan media greke “Zarpanews.gr.”

“Kryeministri shqiptar thekson gjithashtu se fitorja e Partisë Socialiste në zgjedhjet e 11 majit nuk do të jetë vetëm për partinë, por për të ardhmen e Shqipërisë 2030, si anëtare e Bashkimit Europian.

Madje ai shpreh optimizmin për fitoren e PS-së dhe thekson se me mbështetjen e diasporës fitorja do të jetë e thellë.”, shkruan ndër të tjerash media greke.

Kujtohet se Rama ka vizituar Athinën më 12 maj 2024, ku mbajti një fjalim në stadiumin e mbyllur të Galatsit nën masa drakoniane sigurie.

Më shumë se një mijë policë ishin vendosur në atë kohë për të shmangur çdo incident pasi njoftimi i thjeshtë i vizitës kishte shkaktuar reagime.

Për takimin në Athinë, ka pasur reagime të shumta dhe akuza, ku kryedemokrati Sali Berisha është shprehur se mitingu që u kushtoi taksapagueseve shqiptarë mbi 1 milionë euro nuk u organizua nga organizatat e emigrantëve shqiptarë në vendin fqinj, por u organizua nga Kryeministria dhe Ambasada e Shqipërisë në Athinë.

“Së pari duke shfrytëzuar standardet e lirisë të vendit fqinj, organizoi një miting në tërësi me punonjës të administratës së tij të llojit të luftës së ftohtë në Athinë.

Mitingu që u kushtoi taksapagueseve shqiptarë mbi 1 milionë euro nuk u organizua nga organizatat e emigrantëve shqiptarë në vendin fqinj, nuk u përshëndet nga asnjë përfaqësues i ndoshta 1 milionë emigrantëve shqiptarë në atë vend, por u organizua nga Kryeministria dhe Ambasada e Shqipërisë në Athinë dhe në vend të përfaqësuesve të emigrantëve Rama por edhe mitingu u përshëndet nga Eliza e Skënderbuçit dhe ylli i bixhozit të Parisë.”