Shfaqej kudo krah Veliajt, ky është Aurel Çuko, drejtori i Emergjencave Civile nën masë sigurie

Aurel Çuko, drejtori i Përgjithshëm i Emergjencave Civile në bashkine e Tiranës, ishte një nga zyrtarët që  ekspozohej shpesh publikisht krah Erion Veliajt, para arrestimit të këtij të fundit më 10 shkurt.

Për vite me radhë, Çuko shfaqej në çdo aktivitet, inspektim, inaugurim apo komunikim publik ku merrte pjesë Veliaj.

Sot, vetë Çuko ndodhet nën masë sigurie, në kuadër të një hetimi të Prokurorisë.

Sipas informacionit zyrtar të Prokurorisë, hetimet nisën pas denoncimit të qytetarit që pallati i tij u shemb nga IMT në janar 2021 pa njoftim zyrtar.

Prokuroria zbuloi se në janar 2021 janë shembur 6 objekte nga Bashkia Tiranë, përfshirë pallatin nr.140, ndërsa në mars Këshilli Bashkiak miratoi fond për demolimin e 15 pallateve, përfshirë edhe ato që tashmë ishin shembur duke rezultuar në krijimin e dokumentacionit të rremë.

Hetimet treguan se kompanitë fituese të tenderit, “Arb&Trans-2010”, “KLAJGER Konstruksion” dhe “Maging Studio”, përfshinë punime të rreme dhe dokumente të falsifikuara, duke shkaktuar dëm financiar në buxhetin e Bashkisë Tiranë.

Punonjës të IMT-së, Sokol Qehajaj dhe Rexhina Rakipi, kanë hartuar preventivë pa dalë në terren, bazuar vetëm në dokumentet e Emergjencave Civile.

Po ashtu, zyrtarët e lartë të Emergjencave Civile, Aurel Çuko, A. Boriçi dhe Eleana Guçe, kanë firmosur dokumente të pavërteta, duke konsumuar veprat penale të falsifikimit dhe shpërdorimit të detyrës.