Shkarkimi i Presidentit/ Komisioni Hetimor cakton datën e seancës dëgjimore me Metën, kur do të dalë raporti përfundimtar

Komisioni Hetimor për shkarkimin e Presidentit Ilir Meta vendosi që në datën 18 maj të zhvillojë seancë dëgjimore me Kreun e Shtetit dhe më 24 maj të paraqesë raportin përfundimtar të hetimeve. Kështu bëri me dije, Kryetari i Komisionit Hetimor, Alket Hyseni gjatë mbledhjes së sotme.

Ai shtoi se këtë fundjavë do të dorëzohen të gjitha raportet e kërkuara nga institucionet lidhur me objektin e hetimit, ndërsa më 20 maj do të jepen konkluzionet e raportin përfundimtar dhe do i lihen 4 ditë kohë të shkruhet në mënyrë që më 24 maj të bëhet prezantimi përfundimtar i tij në Komisionin hetimor dhe më pas t'i çohet Kuvendit.

"Më 14 maj 2021 do të bëhet miratimi i planit përfundimtar të komisionit hetimor dhe më 17 maj administrimi i raporteve të marra nga institucionet e lidhura me objektin e hetimit, deri në fund të javës do na vijën informacionit nga institucionet.

Më 18 maj do të kemi seancë dëgjimore me Ilir Metën por do të flasim me zyrën e presidentit për të gjetur një datë të duhur por  fleksibiliteti do të jetë i kushtëzuar vetëm brenda javës që vjen pasi afatet janë të përcaktuara.

Më 20 maj do të nxjerrim konkluzionet e hetimit, për t'i dhënë kohë shkrimit të raportit përfundimtar në mënyrë që në 24 maj të jemi në prezantimin final të raporti në Komisionin hetimor dhe më pas ta dërgojmë në Kuvend", tha Hyseni.

Ky i fundit u shpreh se duhet të caktohen dy ekspertë për shqyrtimin e çështjes, duke propozuar që një prej tyre të ishte Erind Mërkuri. Ky i fundit është pedagog dhe është angazhuar në disa veprimtari të Kuvendit që kanë të bëjnë me profilin e tij.

Më 3 maj, 49 deputetë socialistë dorëzuan në Kuvend kërkesën për të nisur procedurat për shkarkimin e Presidentit Ilir Meta. Ata e akuzojnë atë për shkelje të rëndë të Kushtetutës, mbështetje të opozitës dhe se ka shpërndarë mesazhe që nxisin dhunë.

Kjo është hera e dytë që socialistët e ndërrmarrin këtë nisëm. Nga ana tjetër, Meta është shprehur se nuk do të largohet pa i mbaruar mandati, më korrik të 2022. Presidenti është shprehur i gatshëm të marrë pjesë në seancat dëgjimore të komisionit. Sipas tij, deputetët nismëtarë po iu binden urdhrave politikë.

Përbërja e Komisionit:

Kryetar

Alket Hyseni

Nënkryetar

Myslym Murrizi

Sekretar

Klotilda Bushka

Anëtar

Vasilika Hysi

Elena Xhina

Spartak Braho

Halil Jakimi

Nikolin Staka

Arlind Çarçani

Zëvëndësues

Ermonela Felaj

Xhemal Qefalia

Eugen Bojaxhi