Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Maxhorancës

Shpërthejnë pakënaqësitë, PS e Durrësit përplaset me Ramën: Njerëzit po na përzënë

Politiko 7 Shkurt 2025, 10:25

Shpërthejnë pakënaqësitë, PS e Durrësit

Edi Rama kërkon tetë mandate më 11 maj nga Qarku i Durrësit, po aq sa mori në zgjedhjet e vitit 2021. Por, zhvillimet e ndodhura gjatë këtyre katër viteve në këtë qark, keqqeverisja e institucioneve vendore dhe qendrore, si dhe katapultimi në postet kyçe drejtuese të njerëzve që nuk kanë lidhje me Durrësin, kanë shkaktuar pakënaqësi në bazën socialiste.

Burime të Voxnews.al pohojnë se pakënaqësitë e bazës shpërthyen në fillim të kësaj jave, kur në një mbledhje të degës së partisë, ku merrte pjesë edhe vetë Edi Rama, drejtuesi i socialistëve në këtë qark i ka bërë të qartë se objektivi i vendosur prej tij për 8 mandate është i paarritshëm.

“Objektivi i vendosur prej jush në Durrës nuk arrihet, sepse ne po na përzënë, s’po na pranojnë”, mësohet se ka deklaruar në këtë mbledhje kreu i PS-së së Durrësit, Luan Zaza. Deklarata e tij shkaktoi kundër reagimin e Ramës, që i kërkoi shpjegime se përse nuk arrihet ky objektiv.

Por, kulmi i kundërshtimit ndaj kryesocialistit nuk ishte kjo deklaratë. Kulmi ishte fjala e një koordinatori të Partisë Socialiste me kontribut prej dy dekadash në radhët e partisë. Duke cituar një fjalim të ish-Presidentit të SHBA, Teodor Ruzvelt, ai i përcolli Edi Ramës me diplomaci shqetësimin e durrsakëve për katapultimin e njerëzve jashtë rrethit e qarkut në poste kyçe të administratës qendrore e vendore, koston e keqqeverisjes së të cilëve e paguajnë strukturat vendore të Partisë Socialiste.

“Ndërsa po prisnim të zije vend aty në skenë m’u kujtua pjesa The man in the Arena, “Njeriu në skenë” nga fjalimi “Citizenship in a Republic” i Teodor Ruzvelt, të cilën po e lexoj për të gjithë: Merita, i takon njeriut i cili është vërtetë në skenë, fytyra e të cilit është njollosur nga pluhuri, djersa dhe gjaku; ai që përpiqet me trimëri; i cili gabon; i cili dështon, sepse nuk ka përpjekje pa gabime dhe mangësi. Por, ai që në të vërtetë përpiqet në punën e tij, ai i cili njeh entuziazmin dhe përkushtimin, ai që rraskapitet për një kauzë të denjë, i cili në rastin më të mirë në fund vlerëson triumfin e arritjes dhe në rastin më të keq, në qoftë se dështon, të paktën dështon duke guxuar fort. Kështu që, vendi i tij nuk mund të jetë kurrë me ata njerëz indiferent dhe frikacakë, të cilët nuk e njohën kurrë as fitoren e as humbjen”, tha koordinatori socialist.

Këtë fjalim të një prej presidentëve më të mëdhenj amerikanë, koordinatori socialist e lidhi me situatën elektorale në Durrës. Ai ia tha në sy Edi Ramës, se në Durrës, eksportimi nga Tirana dhe rrethet e tjera të drejtorëve ‘Kap ça të Kapësh’ ka armiqësuar Partinë Socialiste me bazën e saj.

“Dua të përsëris një shqetësim, që ta kam shprehur dhe në takimin te ‘Tropikali’ para zgjedhjeve 2021, shqetësimin për drejtorë të “eksportuar” në Durrës nga Tirana apo rrethet që janë bërë “KÇK”, në poste prej vëllait, ministres, mikut, që asgjë s’i lidh me “Skenën Elektorale” në Durrës, apo detyrën në PS! Nuk duan t’ia dijë “KÇK” që sillni në Durrës se je koordinator i PS, Kryetar PS apo ça je. Ata që të presin e të zgjidhin hallin janë të paktë. Durrësi ka pasur dhe ka drejtues shumë të mirë, edhe që kanë mbajtur në shpinë zona shumë të vështira elektorale, prandaj nuk keni pse sillni “KÇK” nga Tirana kur për votat këtu kujdesemi ne”, vijoi ai.

Koordinatori socialist nuk la pa përgjegjësi edhe vetë Edi Ramën, që në 2021 doli deputet në këtë qark.

“Në Durrës në 2021 erdhe vetë i 8-të e të dhamë sa deshe vetë. 8 kërkove, 8 more! Gjithashtu 15871 vota si deputet, përkundër 11412 votave që more në Vlorë! E të gjitha sa thashë më lart lidhen me pritshmëritë që ka pas anëtarësia e PS Durrës nga ty si deputet i Qarkut dhe Kryeministër! E që ta mbyll, situatës tani në Durrës i shkon për shtat shprehja popullore ‘kush han kumbulla e kujt i mpihen dhëmbët’”, tha zyrtari vendor socialist.

Fjalimi koordinatorit vendosi jo pak në siklet Edi Ramën, që i kërkoi emra konkretë se cilët janë drejtorët dhe zyrtarët nëpër institucione që nuk bëjnë detyrën e tyre dhe nuk u përgjigjen halleve të njerëzve.

Përgjigja që mori pas prej koordinatorit ishte se “KÇK janë të gjithë pa asnjë përjashtim”. Koordinatori tha qytetarët durrsakë po i përzënë dhe solli si shembull përpjekjet për t’u takuar me të prekurit nga përmbytjet e fundit. “Tani që vajtën për përmbytjet i kanë nxjerrë jashtë”, tha ai.