Si u justifikua Xhaçka për resortin në jug: Produkt i punës së tim shoqi si emigrant në Itali. Deklarata në Kuvend

Ministrja e Jashtme, Olta Xhaçka ka folur për herë të parë për akuzat se në paligjshmëri dhe në konflikt interesi, familja e saj ka përituar tokë për të ndërtuar një resort në bregdet

Xhaçka mohoi që të jetë në konflikt interesi, ndërsa shtoi se as bashkëshorti i saj dhe as qeveria nuk ka shkelur ligjin. Ajo ironizoi deputetin demokrat Agron Shehajn, duke thënë se “kolegu që i ka hipur kësaj furtune në gotë si ta kishte kalë beteje”. Shehaj e ka denoncuar që në krye të herës këtë rast.

“Përgjigja e shkurtër është që jo, nuk kam shkelur asnjë ligj as unë, as bashkëshorti im, as qeveria, as kryeministri e askush. Nuk jam në konflikt interesi as unë e askush. Këtë e dinë mirë edhe kolegët e opozitës, edhe kolegu që i ka hipur kësaj furtune në gotë si ta kishte kalë beteje.

Që unë nuk jam në konflikt interesi, këtë nuk e them vetëm unë sepse po ta thosha vetëm unë do të ishte fjala e deputetit Shehaj përballë fjalës time. Këtë e thotë ligji, e ka thënë Gjykata Kushtetuese, e ka thënë ILDKPI”, tha Xhaçka.

Kjo e fundit tha se familja e saj është marrë me biznes që në vitet e para të demokracisë, duke mohuar që të mirat materiale i ka përfituar nga postet që ka pasur.

“Im shoq merret me biznes që në vitin 1991. Edhe im shoq, si z. Shehaj e ka nisur biznesin si emigrant në Itali, për ta vazhduar më pas në Shqipëri. Dhe pas 30 vitesh në biznes, është angazhuar sot për të bërë një investim serioz, një hotel me 5 yje në Jug.

Tani, qytetarët kur dëgjojnë z. Shehaj që ulëret për statusin e investitorit strategjik, e konfliktin e interesit apo përfitime abuzive nga publikja natyrshëm ju lind e drejta të mendojnë që këtu po bëhet nami. Që këtu po falen prona e fonde e po shkelet ligji e kushedi çfarë tjetër.

Por në fakt, ky investim është një investim privat, në një truall privat, nga investitor privat. Nuk është përfituar asnjë qindarkë nga fondet publike dhe asnjë metër truall pronë publike për ndërtimin e këtij hoteli me 5 yje. Çdo qindarkë e këtij investimi është produkt i punës 30 vjeçare si një biznesmen i suksesshëm të papërfshirë në tendera apo prokurime apo asgjë tjetër që ka të bëjë me përfitimin e fondeve publike”, shtoi ajo.

Partia Demokratike ka dorëzuar në Kuvend një mocion për “konstatimin e pavlefshmërinë dhe mbarimin e mandatit të deputetes Olta Xhaçka”.

Sipas kërkesës, Xhaçka ka përfituar drejtpërdrejt të mira publike nëpërmjet vendimeve të Komitetit të Investimeve Strategjike në favor të kompanive në zotërim të bashkëshortit të saj, ish-deputetit socialist, Artan Gaçi dhe familjarëve të tjerë të ministres.

Deputetët e PD-së arsyetojnë se bazuar në ligjin nr. 9367/2005 për konfliktin e interesit provohet se deputetja Xhaçka ka kryer veprimtari fitimprurëse që burojnë nga pasuria e shtetit.