“Udhëtim 120 mijë euro me charter”, Rama i përgjigjet PD-së: Kisha biletë ekonomike, kushtoi 345 euro

Kryeministri Edi Rama ka reaguar pas akuzave të Partisë Demokratike se ka shpenzuar 120 mijë euro karburant për udhëtime private me charter.

Teksa i përgjigjet pyetjeve të deputetes Orjola Pampuri, Rama i përgjigjet se udhëtimi ishte “ekonomik” dhe se bileta vajtje-ardhje ka kushtuar 234 euro.

Përgjigja e Ramës:

Pampuri: Rama ka udhëtuar me charter privat, jo për të zgjidhur ndonjë hall të shqiptarëve por për qejfet e veta.  Edi Rama harxhon paratë e taksave të shqiptarëve.

Rama: Në fakt jo, une jam i pari kryeministër në këtë vend që udhëtimet e mia shumë të rralla private me familjen, nuk i bëj kurrë me shpenzimet e shtetit.

Pampuri: A përdore charterin privat  për të dhënë intervistë për ”Manager Magazine”?

Rama: Jo, kam përdorur me biletë vajtje-ardhje, ulëset ekonomike të Lufthansës, sëbashku me gruan dhe djalin e vogël.

Pampuri: Sa para ke shpenzuar vetëm për charterin në këtë udhëtim luksi?

Rama: Bileta ekonomike ka kushtuar 345 Euro.

Pampuri: Kush ka firmosur për udhëtimet e tij?  Kush i ka paguar ato?

Rama: Mesatarja vjetore e shpenzimeve për udhëtimet e mia zyrtare, të cilat paguhen nga fondi i kryeministrisë, është më e ulët se sa mesatarja vjetore e shpenzimeve të paraardhësve të mi, për arsyen e thjeshtë se ata udhëtonin në business class ndërsa unë kam udhëtuar thuajse tërësisht në ekonomik, me përjashtim të ndonje rasti të veçantë, e njëjta gjë edhe për ministrat. Ndërkohë qysh prej vitit 2020, kur kishim presidencën e OSBE, u bë një marrëveshje me kompaninë Air Albania dhe shpenzimi për vitin 2021 ishte nën mesataren e viteve të mëparshme.

Pampuri: Vetëm për karburantin e një udhëtimi qejfi të Edi Ramës, harxhohen 120 mijë euro nga paratë e shqiptarëve.

Rama: Sasia me e lartë vjetore e shpenzimeve për udhëtimet e mia zyrtare ka qenë 4.623.089 lek në vitin 2014. Ndërsa shifra 120 mijë euro karburant për fluturim privat, është produkt i të njëjtës aritmetikë fantastiko-shkencore, që nga 1958 ulëset e Pallatit të Kongreseve nxorri 5004 delegatë. Po t’i shumëzosh këta delegatë me 30 dhe pastaj të zbresësh 30, dalin fiks 120 mijë euro karburant për 7×7 brava, baraz 42 fluturime.