Ultimatum nga BE për integritetin e kandidatëve? Rama: Mora vlerësime, në Bruksel kërciti vetëm ndërhyrja e gazetares

Kryeministri Edi Rama

Kryeministri Edi Rama gjatë konferencës së sotme foli edhe për vizitën e tij në Bruksel.  

I pyetur nëse ndjeu përgjegjësi për ultimatumin nga zyrtarët e BE-së lidhur me integritetin e kandidatëve që do të garojnë në zgjedhje, Rama tha se nuk kishte asnjë lloj ultimatumi.

Kryeministri akuzoi gazetaren Erisa Zykaj se me pyetjen e saj prishi imazhin e vendit. Pyetja e gazetares dje në Bruksel lidhur me kanidatët e inkriminuar. Ai u ndal te Reforma Zgjedhore, ndërsa i dha vetes disa "merita".

"Vetëm faktet nuk janë opinione. edhe koncepti i fakteve alternative është një koncept që ka hyrë së fundmi në shoqërinë njerëzore, si rezultat i lajmeve të rreme. Në Bruksel nuk kam dëgjuar asnjë ultimatum, përkundrazi kam dëgjuar vlerësime absolutisht pozitive për Shqipërinë, sic i dëgjuan ata shqiptarë që nuk jetojnë në botën e fakteve alternative.  Ajo është një referencë e stërdiskutuar, e stërkomentuar për një kohë të gjatë.

Unë nuk kam dëgjuar asnjë ultimatum, dhe më vjen jashtëzakonisht mirë që koha tregoi se unë kisha të drejtë për reformën zgjedhore dhe që reforma zgjedhore ka marrë vlerësime maksimale bazuar në Opinionin e Komisionit të Venecias, kështu që nëse ka pasur në Bruksel diçka që ka kërcituar njësoj sic kërcet një derë e vjetër në sfond kur luhet një koncert në sallë, ka qenë ndërhyrja e koleges tuaj, një ndërhyrje e pavend dhe absolutisht e padobishme, për të mos thënë turpëruese për kategorinë e gazetarëve, për të gjithë ju dhe të gjithë ne, bazuar në fakte alternative dhe në një kontrast turpërues me kolegen tjetër tuajën nga Maqedonia e Veriut, që në atë vend foli për vendin e vet. Nuk i ra vendit të vet me baltë, të prodhuar në fabrikat e fakteve paralele të botës alternative”, tha Rama.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm