Zjarret në Vlorë/ Deputeti i PS sulmon Lelin: Zjarrfikësit s'kanë nevojë t’u mësosh si mbahet pompa e ujit, po i fikin flakët si para 100 viteve

Kryebashkiaku i Vlorës, Dritan Leli është sulmuar nga socialistët edhe për çështjen e zjarreve që kanë përfshirë qytetin bregdetar ditët e fundit.

Deputeti i zgjedhur i PS-së, Ilir Metaj i drejtohet Lelit dhe prefektit të Qarkut Vlorë se zjarrfikësit nuk kanë nevojë për qoka, por për të patur “armët” e nevojshme në kohë lufte.

Në një postim në rrjetet sociale, Metaj shkruan se Bashkia e Vlorës ka për detyrë t'ju plotësojë kërkesat zjarrfikësve dhe mos t'i lënë të armatosur vetëm me gjeshtra e shkurre tek mundohen të shuajnë flakët, sikur para 100 vjetëve. Ai i kërkon kryebashkiakut që shërbimit zjarrfikës t'i krijohet mundësia që të hedhin ujë mbi zjarre avionë dhe helikopterë.

Reagimi i plotë:

Të dashur Kryetar i Bashkisë dhe Prefekt i Qarkut Vlorë, zjarrefikësit që po luftojnë me flakët në Karaburun e gjetkë, nuk kanë nevojë “tu mësoni” si mbahet pompa e ujit, ku ta hedhin ujin apo të shërbejnë si aktorë dytësorë në fotot që hidhni për të treguar “se u jeni afër”.

As të kujtoheni se zjarrëfikësit ekzistokërkëshin kur shpëtuan jetë njerëzish nën rrënojat e tërmetit duke rrezikuar asgjë më pak sesa jetën e tyre.

Ata nuk kanë nevojë për qoka!

Kanë nevojë që në kohë paqe, t’i pyesni e të mbani shënim, çfarë nevojash kanë për të patur “armët” e nevojshme në kohë lufte.

Makina efektive, veshje profesionale, mjete cilësore.
Dhe detyra juaj është tu plotësoni këto kërkesa!
Jo qoka!

Dhe për të mos i lënë të armatosur vetëm me gjeshtra e shkurre tek mundohen të shuajnë flakët, sikur para 100 vjetëve, kur shkoni për vizita “të suksesshme” jashtë shtetit, krijoni mundësinë tu dërgojnë avionë e helikopterë të hedhin ujë mbi zjarre( në momentet kritike si këto).

Ose,nëse nuk bëni dot miq t’u ndihmojnë falas në ditë të vështira, merrni me qera një helikopter të mbushë ujë në det, e ta zbrazë mbi flakët e Karaburunit.

Se nuk është ndonjë shkencë e madhe jo.
Mjafton dëshira, vullneti, njerëz punëtorë.
Kështu i ndihmojmë edhe zjarrëfikësit, edhe pyjet, edhe sezonin turistik.
Kështu ndihmojmë Vlorën!