‘2500 biznese të mbyllura në Shkodër’/ Spahia: Dëbim i orkestruar

Deputeti i PD qarku Shkodër Bardh Spahia ka ngritur alarmin për situatën e rëndë të biznesit të vogël dhe të mesëm në kryeqëndrën e veriut, duke deklaruar se mbi 2500 biznese janë mbyllur vitet e fundit.

Sipas tij, kjo nuk është një krizë tregu, por një ‘dëbim i orkestruar’ nga pushteti qendror dhe lokal, përmes taksave të larta, tarifave dhe mungesës së mbështetjes.

Reagimi i plotë i deputetit Bardh Spahia:

Zhurma e qepenave që mbyllen mbyt zhurmën e pushtetit grabitqar.

​Nuk ka zhurmë më të dhimbshme sot në rrugicat e Shkodrës sesa zhurma e metalit të ftohtë të qepenave që ulen përgjithmonë.

Mbi 2500 biznese janë mbyllur përgjithmonë në Shkodër gjatë viteve të fundit.

Çdo biznes që mbyllet nuk është thjesht një statistikë. Është një derë shtëpie që kyçet, një ëndërr familjare që vritet dhe një biletë avioni pa kthim.

​Kjo që po ndodh me biznesin e vogël dhe të mesëm në Shkodër nuk është ‘krizë tregu’. Ky është një dëbim i orkestruar.

Pushteti, qendror dhe lokal, është kthyer në kamzhikun më të dhimbshëm të tregtarit. Rrisni taksat, shpikni tarifa, por çfarë ofroni? Asgjë.

Ju i merrni frymën biznesit të ndershëm për të mbushur arkat që i zbrazni me korrupsion, ndërsa qytetarin e lini vetëm përballë mbijetesës.

Të bësh biznes me ndershmëri në Shkodër sot është kthyer në një akt heroizmi gati vetëvrasës. Bizneset janë lënë në mëshirë të fatit, të shtrydhur nga abuzimi i zyrtarëve me vulë shteti e blloqe gjobash ditën, dhe nga presioni i krimit që lulëzon nën hundën e pushtetit natën.

Realiteti i dhimbshëm i tregtarëve në Shkodër nuk lyhet dot me ngjyra dritash që verbojnë mendjet e lehta.

Dritat e festave nuk e mbulojnë dot errësirën e varfërisë.

Koncertet në pedonale nuk e mbytin dot zhurmën e qepenave që mbyllen.

​Kjo fasadë është fyerja më e madhe për inteligjencën e shkodranëve. Shkodra nuk është mbajtur kurrë me propagandë Instagrami, por me ndershmëri, liri ekonomike dhe siguri.

​Shkodra po humbet ajkën e saj.

Po ikin njerëzit e punës.

Po ikin të ndershmit që nuk duan të bëjnë pis duart e tyre në xhepat e të tjerëve.  Por, mos harroni, Shkodra u ka mbijetuar shumë pushtuesve e tiranëve, dhe do ti  mbijetojë edhe kësaj babëzie administrative.

​Sot, heshtja nuk është opsion. Të mbrojmë biznesin e tregtarëve të ndershëm do të thotë të mbrojmë dinjitetin e qytetit dhe të ardhmen që Shkodra meriton, larg pangopjes së atyre që mbijetojnë si shushunja nga gjaku i të ndershmëve.