Aeroporti i Vlorës/ Berisha publikon dokumentin: Balluku firmosi për kalimin e aksioneve te Pacolli

Kryetari i Partisë Demokratike, Sali Berisha, publikoi sot gjatë një deklarate nga selia blu, një dokument që, sipas tij, provon se ministrja e Infrastrukturës dhe Energjisë, Belinda Balluku, ka firmosur për kalimin e aksioneve të aeroportit të Vlorës tek kompania “Mabco Construction”, e lidhur me biznesmenin Behgjet Pacolli.

Berisha deklaroi se kjo kontratë, sipas tij, është pjesë e një “aferë të rëndë korruptive”, ku përfshihen figura të larta të qeverisë.

Ai akuzoi Ballukun për “firmosje të një garancie 140 milionë euro” që, sipas tij, detyron taksapaguesit shqiptarë të paguajnë shuma të mëdha edhe në rast se aeroporti nuk do të ketë asnjë fluturim gjatë dhjetë viteve të para të operimit.

Në fjalën e tij, Berisha u shpreh se tenderi i parë për ndërtimin e aeroportit ishte fituar nga një konsorcium turk me eksperiencë në menaxhimin e aeroporteve, por se pas një viti, Balluku kishte firmosur kalimin e aksioneve nga kompania turke tek “Mabco Construction”, duke rrëzuar, sipas tij, shtyllën kryesore të tenderit.

Ai shtoi se, në këto kushte, çdo qytetar ka arsye të dyshojë se aksionet mund të jenë në pronësi të zyrtarëve të lartë të qeverisë, përfshirë kryeministrin Edi Rama dhe ministren Balluku.

Sipas tij, përfshirja e këtyre figurave në këtë proces tregon për një “aferë që shkon përtej një konflikti mes ortakësh privatë” dhe që kërkon, siç tha ai, “një hetim të gjithanshëm”.

Berisha theksoi se zyrtarët qeveritarë po përpiqen të largojnë vëmendjen nga thelbi i çështjes përmes “debatit të simuluar” mes ortakëve Bexheti dhe Pacolli, ndërsa theksoi se “problemi real është garancia e firmosur nga Balluku dhe mbështetja politike që, sipas tij, ajo gëzon”.

PJESË NGA DEKLARATA

Përpiqen jo Bexheti, jo Valoni, jo Valoni, jo Bexheti.

Ç’punë kanë ata?

Shtylla e zezë e korrupsionit është garancia që është dhënë nga Lubi Balluku, e papërmbajtur në hajnitë dhe vjedhjet e saj.

Dhe që mbrohet nga Skapi i partisë.

Ja ku është...

Kjo është e vërteta.

Prandaj dhe këta, të gjithië janë vërsulur gjoja në grindjen që ka Bexheti me Valonin.

Po në qoftë se ata kanë grindje, le t’i zgjidhin. Janë qytetarë privatë ata.

Pra, janë interesa kriminale të Edi Ramës, Lubi Ballukut, Taulant Ballës dhe dhëndrit të Lubi Ballukut, djalit të Sadri Abazit.

Po, ka marrë kushërirën e parë të Lubisë.

U garantoj se mënyra se si po e trajtojnë këta, nuk po hyj fare se kush ka të drejtë prej këtyre të dyve, absolutisht, sepse unë jam i lirë nga ky problem sepse e kam denoncuar i pari si një aferë të tmerrshme korruptive.

Tani shoh që në qoftë se në djegësin e Tiranës u vodhën paratë dhe nuk u hodh një tullë, në aeroportin e Vlorës janë premtuar 140 milionë euro, edhe sikur një avion të vetëm të mos ulet në pistën e tij gjatë 10 viteve të para.

Se është me rrezik.

Atëherë kjo ka një gjë shumë të thjeshtë, në qoftë se nuk duan të vjedhin, nuk ndërtohet aeroport me 100 milionë euro, ndërtohet aeroport me 15 milionë euro.

Fillohet, shtohen pasagjerët, shtohet pista, shtohet mjedisi.

Shtohen çarterat e mëdhenj, zgjatet pista.

Kjo praktikë është ndjekur me Rinasin dhe e kanë ndjekur privatët këtë praktikë.

E kishin gjermanët, e ndoqën, nga gjermanët e morën kinezët, po këtë bënë. Nga kinezët, e morën shqiptarët, po këtë bënë.

Tani ku fle lepuri?

Ua them unë.

Çfarë ka ndodhur?

Lubia, jo vetëm firmos kontratën për një siguri 140 milionë, por Lubia një vit mbrapa firmos transferimin, ja ku e keni zëvendëskryeministre dhe ministre.

Firmos kalimin e aksioneve nga kompania turke, e cila është kompani me ekspertizën në ndërtimin dhe menaxhimin e aeroporteve, pa të cilën aeroporti nuk ndërtohej. Pra firmos kalimin e aksioneve nga kjo kompani tek Mabco Construction.

Që në këtë moment, tenderi rrëzohet.

Shtyllë kryesore e tenderit nuk ishte Mabco Construction sepse nuk kishte asnjë eksperiencë, por kishte kompania turke që ishte ndërtuese dhe menaxhuese aeroportesh.

Dhe, një numër kompanish të tjera që u paraqitën në tender, por që nuk kishin ekspertizën e kompanisë turke, u përjashtuan.

Tani, kompania me ekspertizë u thotë mirupafshim dhe Lubia firmos për kalimin e aksioneve tek Pacolli.

Tani, çdo shqiptar absolute të dyshojë se ato aksione janë të Edi Ramës dhe Lubi Ballukut.

Dhe këtu mund të jetë, kjo do hetim të gjithanshëm, shkaku i angazhimit kaq intensiv të Edi Ramës, Lubi Ballukut, Taulant Ballës e me radhë në një aferë që në pamje është një aferë midis dy ortakëve. Pa lidhje me shtetin.

ZYRA E MEDIAS DHE KOMUNIKIMIT, PARTIA DEMOKRATIKE