"Le të qorrohet mes intrigës"/ Akuzat për lobim në favor të Këlliçit, anëtarja e Këshillit i përgjigjet Kokalarit

Anëtarja e Këshillit Kombëtar të PD-së, Minushe Lazaj ka reaguar pas pretendimeve të Evi Kokalarit se ajo ka lobuar për zgjedhjen e Belind Këlliçit si anëtar i Kryesisë, duke dalë kandidatura më e votuar.

Përmes një reagimi në rrjetet sociale, Lazaj thotë se nuk është e vërtetë dhe se nuk ka mbështetur një individ të caktuar dhe se ka punuar për PD-në, në vitet që ka qenë e angazhuar pranë kësaj partie.

“Minushe Lazaj ka një CV, një kontribut dhe një gamë shumë të gjerë njërëzish më të cilët ka punuar dhe jo e mbështetur tek një individ i caktuar, çka më jep mua të drejtën dhe lirinë për të mbështetur vet dhe përmes njohjeve të mia, ata të cilët unë gjykoj se meritojnë mbështetjen time, dhe nuk është një.

Kam punuar mbi të gjitha dhe gjithkënd për Partinë Demokratike duke e vlerësuar si angazhim publik për vendin tim dhe nuk jam bërë kurrë pjesë klanesh e aq më pak intrigash okulte, fenomene rëndom në organizata partiake”, shkruan ajo në rrjetet sociale.

Lazaj ka publikuar CV e saj politike në Partinë Demokratike, ndërsa fton Kokalarin që të verifikojë punën e saj në PD.

“Ftoj Evi Kokalarin dhe këdo të interesuar për të vërtetën e Minushes, të verifikoj gjithë sa më sipër mbi kontributin dhe pozicionet e mia një për një, çdo datë e çdo angazhim apo detyrë. Mund të kem anashkaluar diçka se i thonë 16 vite por deformuar asgjë.

Kush nuk e dëgjon apo suporton dot të vërtetën le të qorrohet mes intrigës. Nuk i kam borxh askujt në PD, gjithë sa arritur në saj të punës dhe profesionalizmit tim. Një gabim nuk bëhet i vërtetë sepse ai është i përhapur, as e vërteta bëhet e gabuar kur nuk e shikon asnjë”, shton Lazaj.

Kujtojmë që në statusin e Kokalarit thuhej se “Këlliçi pati pafytyrësinë të loboj nëpërmjet Minushes që ka qënë ish-sekretarja e Flamurit, duke lënë të nënkuptohej se lobimin po e bënte Flamur Noka. Në fakt Flamuri se kishte idene fare çfare po ndodhte.

Minushja tashmë punon për Besart Xhaferajn, shokun e fëmijërisë së Belindit i cili u fut në Keshilli me kuotat e rinisë dhe jo me votë. Dhe Minushaj ashtu u fut”.

Reagimi i plotë i Lazaj:

Një sqarim publik të imponuar nga një opinion të pavërtetë të znj. Evi Kokalari mbi emrin tim.
Unë jam Minushe Lazaj, anëtare e Këshillit Kombëtar të PD për herë të tretë dhe me një CV politike si më poshtë:
Përfshirja aktive daton në 2006 si fillim në FRPD si studente në Shkenca Politike. Me vullnetin tim kërkova atashim pa njohje apo mbështjetje të ndonjë individi të caktuar.
Aktive me FRPD në fushatën elektorale për pushtetin lokal në 2007.
Në 2009 fal një pedagogeje të nderuar edhe pranë PD, me kërkesë të saj filloj punë vullnetare në kuadër të përgatitjeve për fushatën elektorale në Selinë Qëndrore të PD. Paralelisht me këtë angazhim, vijoja angazhimin edhe në strukturat e Degës Nr. 1, atëherë e ashtuquajtur Grupseksioni Nr. 1.
Me çeljen zyrtare të fushatës u formua Stafi i Kryeministrit dhe Kryetarit të PD Prof. Dr. Sali Berisha për organizimin e mitingjeve në gjithë Shqipërinë. Një nga 10 anëtarët e këtij stafi isha edhe unë, me kërkesë të shefave të organizimit aso kohe Z. Albert Avdulaj dhe Z. Florian Xhuti.
Në 2011 filloj punë si pjesë e administratës së PD. Aty fillon njohja dhe bashkëpunimi me Sekretarin Organizativ Z. Flamur Noka i cili më vlerësoi punën dhe më emëroi Asistenten e tij si Ministër në Ministrinë e Brendshme 26 Korrik 2012 deri gati fund Shtatori 2013.
Në 2014 emërohem Asistente e Sekretarit të Përgjithshëm Z. Arben Ristani deri në nëntor 2016.
Nëntor 2016 emërohem Staf Kabineti i Kryetarit të PD Z. Lulzim Basha duke punuar ngushtësisht me Shefen e Kabinetit Greta Delijani, punë të mbuluar paralelisht me punë të tjera duke vijuar edhe me shefin e radhës së Kabinetit Z. Dorian Teliti.
Maj 2017 emërohem Këshilltare e Ministrit Teknik të Brendshëm me kërkesë të Kryetarit të Partisë si rrjedhoj e mbulimit të punës në departamentit e Rendit dhe Sigurisë qysh sa dolëm në opozitë e në vijim pa ndalim.
Në Shtator 2017 emërohem Sekretare e Grupit Parlamentar të PD, pozicion me punë të drejtpërdrejtë me Kryetarin Grupit Z. Edmond Spaho e për rrjedhoj me gjithë Deputetët e Grupit.
Pas djegies së mandateve vijova punën e pandalur paralelisht me sa më sipër nga 2016 atë të stafit të Kabinetit të Kryetarit kryesisht me Protokollin e çdo aktivitet në axhendën e Kryetarit.
Kam qënë anëtare Komisioni në Komisionet Zgjedhore në të gjitha degët e Shqipërisë në zgjedhjet e FRPD për Kryetar në 2015 në zbatim të rregullores dhe statutit me paanësi mes kandidatëve rreptësisht strikte.
Anëtare Komisioni në Procesin Zgjedhor për Kryetar të PDSH në zgjedhjet e 2017, duke mbuluar gjithë ngarkesën e punës me kryetarin e Komisionit Z. Jemin Gjana.
Anëtare Kryesie e FRPD që nga viti 2016.
Deleguar për Procese Zgjedhore të Brendshme në disa degë të Tiranës përkatësisht degët 3, 6, 7, 8, 9, 16.
Zgjedhjet e 2015 pjesë aktive në strukturat e Degës 2 në shtabin qëndror të saj.
Korrik 2020 e Deleguar në gjithë qarkun Gjirokastër për mbledhjen e propozimeve për kandidaturat për deputet.
Në Zgjedhjet Elektorale të 2021 isha Shefe Shtabi e Drejtueses Politike Znj. Jorida Tabaku në Degët 2, 3 dhe 10.
Anëtare në Sekretariatet e Kuvendeve Kombëtare të PD përkatësisht 2018, Korrik 2021 dhe në Kuvendin e 11 Dhjetorit 2021.
Minushe Lazaj ka një CV, një kontribut dhe një gamë shumë të gjerë njërëzish më të cilët ka punuar dhe jo e mbështetur tek një individ i caktuar, çka më jep mua të drejtën dhe lirinë për të mbështetur vet dhe përmes njohjeve të mia, ata të cilët unë gjykoj se meritojnë mbështetjen time, dhe nuk është një.
Kam punuar mbi të gjitha dhe gjithkënd për Partinë Demokratike duke e vlerësuar si angazhim publik për vendin tim dhe nuk jam bërë kurrë pjesë klanesh e aq më pak intrigash okulte, fenomene rëndom në organizata partiake.
Ftoj Evi Kokalarin dhe këdo të interesuar për të vërtetën e Minushes, të verifikoj gjithë sa më sipër mbi kontributin dhe pozicionet e mia një për një, çdo datë e çdo angazhim apo detyrë. Mund të kem anashkaluar diçka se i thonë 16 vite por deformuar asgjë.
Kush nuk e dëgjon apo suporton dot të vërtetën le të qorrohet mes intrigës.
Nuk i kam borxh askujt në PD, gjithë sa arritur në saj të punës dhe profesionalizmit tim.
Një gabim nuk bëhet i vërtetë sepse ai është i përhapur, as e vërteta bëhet e gabuar kur nuk e shikon asnjë.