Amnistia Fiskale, deputeti i PD: Bëhet për të legalizuar paratë e Alda Klosit dhe të tjerëve si ajo në qeveri

Deputeti i Partisë Demokratike, Dashnor Sula ka kritikuar nismën e qeverisë për Amnistinë Fiskale duke marrë shkas nga hetimi i ish-zyrtares Alda Klosi, në banesën e së cilës dyshohet se u vodhën mbi 120 mijë euro dhe 30 mijë dollarë nga pastruesja e shtëpisë.

 Në një postim në Facebook, Sula shkruan se janë trafikantët dhe hienat e administratës publike ata që kanë para të padeklaruara dhe se ky projekt nuk i shërben aspak emigrantëve shqiptarë që kanë punuar me ndershmëri në një vend të huaj.

“Projekti i qeverisë për Amnistinë Fiskale nuk i shërben aspak emigrantëve shqiptarë që kanë punuar me ndershmëri në një vend të huaj, por kërkohet me ngulm nga kjo mazhorancë për të legalizuar paratë e Alda Klosit, dhe të tjerëve si ajo në qeveri dhe në administratën e kësaj mazhorance.

Insistimi i dy ministrave sot edhe pas skandalit me ish-drejtoreshën e koncesioneve është tregues i qartë i qëllimit real i qeverisë për amnistinë fiskale.

Shqiptarët që kanë emigruar që nga vitet 90 në vendet e huaja, janë integruar, kanë marrë edhe banesa, janë  shkolluar dhe nuk kanë para të jashtligjshme.

Para të pa deklaruara kanë trafikantët dhe hienat në administratës publike që grabisin qytetarët shqiptarë cdo ditë.

Vec vjedhjes së përditëshme, amnistia fiskale do ti dëmtoj edhe më shumë qytetarët e thjeshtë sepse leku i pisët do i ngrej edhe më shumë cmimet e ndërtimeve dhe do dëmtojë biznesin e ndershëm.

Për më tepër Amnistia Fiskale është 180 gradë në drejtim të kundërt me politikat dhe orientimin e Bashkimit Evropianë.

Qytetarët shqiptar i kanë sytë nga BE, ndaj edhe qeveria duhet të heq dorë nga nismat e saja për të forcuar bandat dhe ta largojë vendin nga BE”, shkruan Sula.