Apeli i riktheu vulën e PD-së Berishës, deputetët e parë që braktisin Bashën: S’na duhet opozitë e përçarë

Eralda Bano është deputetja e parë, e cila është larguar nga grupimi i Lulzim Bashës, për t'iu bashkuar PD-së zyrtare e drejtuar nga Sali Berisha, pasi ky i fundit mori vulën dhe logon e Partisë Demokratike.

"Të dashur qytetarë,

Lufta me veten është lufta më e vështirë dhe forma më sublime e rimëkëmbjes, luftë e cila është e domosdoshme dhe jetike. Kjo luftë do duhet të na forcojë e të na kthejë në modelin më të mirë të vetes.

Demokratë të nderuar,

Dëshiroj të shpreh përulësisht një mirënjohje të thellë për këdo që më ka mbështetur në këto vite!

Jam mirënjohëse ndaj miqve, kolegëve,simpatizantëve të mi dhe kujtdo që ka marrë guximin të më kritikojë. Jam e bindur që në ditë të vështira nevoja për të reflektuar mbi të ardhmen prevalon mbi çdo ideologji, bindje apo mendim.

Jam e vetëdijshme se rruga më e mirë për të rikthyer shpresën në çdo vatër shqiptare është që të kemi një opozitë të formuar, të papërçarë dhe të pathyeshme, sikundër jam e bindur që debati i brendshëm duhet të vazhdojë për të mirën e të gjithëve.

Vendimi im politik është i thjeshtë. Unë jam, dhe do të mbetem deputete e Partisë Demokratike të Shqipërisë", shkruan deputetja. 

Veç deputetes së Fierit, ka vendosur t’i bashkohet Grupit Parlamentar të PD-së edhe deputeti i Matit, Kreshnik Çollaku.

Në një postim në facebook, ai shkruan “Unë jam e do te mbetem deputet i Partisë Demokratike”.

Sakaq, një sqarim më të shtjelluar deputeti e ka dhënë për një komentues ku thotë se mandatin e ka marrë nga votuesit e PD dhe nuk mund ta shpërdorojë atë për një forcë tjetër politike veç PD-së.

"Une jam student dhjetori dhe themelues i PD. Une jam deputet me votat e demokrateve,te cilet prej dy vitesh jane te ndare. Dhe ata qe prej dy vitesh na mbeshteten dhe ata qe na kundershtuan jane demokrate.

Ata me votuan qe te perfaqesoj PD. Une betejen e bera per PD. Une nuk kam asnje te drejte qe mandatin e marre nga demokrate qe nje pjese mendon si une ose nje pjese ndryshe nga une, ta kaloj ne cdo subjekt tjeter politik qe nuk eshte PD", shkruan Çollaku.