"Aplikimet në Mjekësi ranë me 40%"/ Vasili: Studentët u dekurajuan nga ligji absurd i qeverisë

Deputeti i Partisë së Lirisë, Petrit Vasili, ka reaguar përmes një postimi në Facebook lidhur me rënien drastike të interesit për të ndjekur studimet në Fakultetin e Mjekësisë.

Sipas Vasilit, të dhënat e fundit që tregojnë një ulje me 40% të aplikimeve, nga 2035 në vitin 2024 në 1202 në vitin 2025, janë një provë e qartë e dështimit të paralajmëruar të ligjit për diplomat me kusht, i miratuar nga qeveria me shumicën e saj parlamentare.

Vasili e cilëson këtë politikë si “çmenduri të injorancës” dhe “vjedhje të trefishtë” ndaj qytetarëve shqiptarë, ndërsa akuzon kryeministrin Edi Rama dhe 74 deputetët që votuan ligjin si përgjegjës për shkatërrimin e besimit të të rinjve në sistemin arsimor publik.

Reagimi i Vasilit

Dështimi i paralajmëruar i diplomave me kusht në mjekësi bëri që kërkesat të bien 40%!

Numri i aplikimeve për të studiuar mjekësi ka rënë plot 40%, pra gati përgjysmë.

Të dhënat flasin qartë: nga 2035 aplikues në vitin 2024, ato ranë në 1202 në vitin 2025.

Ky është rezultati i çmendurisë së injorancës së Edi Ramës dhe i të gjithë të paaftëve që e rrethojnë, të cilët votuan ligjin për diplomat me kusht për studentët e Fakultetit të Mjekësisë.

Dëgjuam atëherë të gjitha “debilitetet” e mundshme nga Rama dhe përfaqësuesit e tij, në mes të vapës dhe studentëve që protestonin me shumë të drejtë.

Ju shpjeguam qartë se kjo do të sillte të kundërtën dhe do të dekurajonte dëshirën për të studiuar në mjekësi!

Ju shpjeguam me shumë përgjegjësi se diplomat me kusht ishin një vjedhje e shëmtuar trefishe, sepse:

◾️ Së pari: paguajnë taksa;
◾️ Së dyti: paguajnë nga të ardhurat e tyre me djersë e sakrifica të panumërta për mbajtjen e fëmijëve në universitet;
◾️ Së treti: u dashka, sipas Ramës, që të paguajnë përsëri edhe mijëra euro të tjera nëse fëmijët e tyre duan të diplomohen, por nuk shkojnë në punën e detyruar në mënyrë arbitrare e të paligjshme nga qeveria;
▪️ Së katërti: universitetet publike funksionojnë me paratë e taksave të qytetarëve;
▪️ Së pesti: Kushtetuta e Shqipërisë nuk vendos asnjë kusht për diplomimin e tyre, përveç aftësisë dhe përmbushjes së kushteve universitare të formimit profesional — pra nuk ka asnjë kusht kontrate pune apo shpikje të tjera idiote të këtij soji, siç shpikin rilindasit dështakë.

Ku është dhe pse s’flet për këtë dështim Rama dhe “ramkat”, që u shqyen për të votuar me dhunë me votat e 74 deputetëve të shpëlarë nga personaliteti, turpi dhe faqja e zezë e diplomave me kusht?

Po ata 74 deputetët që votojnë çdo gomarllëk të Ramës, a ju vjen turp kur shohin shkatërrimin që sjellin me votat e tyre?