Asnjë ligjvënës verior në kabinetin qeveritar, Gjoni: S’është rastësi, por trashëgimi e etërve të Ramës!

Kandidati demokrat në Qarkun e  Lezhës, Gjin Gjoni shprehet se përfaqësimi rajonal dhe fetar në kabinetin qeveritar dhe hierarkinë shtetërore, ka qenë një traditë e kahershme e shtetit shqiptar, por se kjo traditë nuk është respektuar në dy periudha, përkatësisht gjatë viteve 1945-1990 nga Enver Hoxha dhe së dyti nga 2013- 2025 nga Edi Rama.

Kjo sipas Gjonit, nuk është rastësore, veçse një trashëgimi e etërve të Ramës, i cili në vend të ligjvënësve veriorë ka vënë dy trarë, kanabis dhe mungesë investimesh në infrastrukturë.

Statusi

Asnjë ligjvënës nga 4 Qarqet e veriut në kabinetin qeveritar, dy trarë, kanabis dhe mungesë investimesh në infrastrukturë!

Përfaqësimi rajonal dhe fetar në kabinetin qeveritar dhe hierarkinë shtetërore ka qenë një traditë që nga krijimi i Shtetit Shqiptar, teksa kjo traditë nuk është respektuar në dy periudha, së pari përgjatë viteve 1945-1990 nga Enver Hoxha dhe së dyti nga 2013 në 2025 nga Edi Kristaq Rama.

Sot në kabinetin qeveritar të Edi Ramës nuk ka asnjë ligjvënës të zgjedhur nga katër qarqet e veriut të vendit, çka përbën një skandal pasi në këtë rajon jeton 35% e popullsisë së vendit dhe 25% e popullsisë së Tiranës dhe Durrësit përbehet nga banorë që vijnë nga këto rajone.

Në kabinet as në krye të Parlamentit dhe Presidencës nuk ka asnjë përfaqësues nga komuniteti katolik, ç’ka dëshmon qartë se përçmimi që Edi Rama ka për emrat Gjin, Gjon, Mark, Fran, Frrok, Ndoc, nuk është rastësi, por trashëgimi e etërve të tij.

Rama me Manualin e etërve të tij i diktoi veriut Kryetarë Bashkie të standardit Gjici e Xhelili, teksa merkaton politike në prag zgjedhjesh në veri e ka kthyer në traditë ashtu si blerjen e votës me paratë e drogës dhe korrupsionit.

Mirdita, Puka, Kukësi, Dibra Mati, Tropoja dhe Bulqiza Malësia e Madhe ndonëse kanë pasuri nëntokësore dhe ujore që mund të siguronin begati për mbarë vendin, notojnë në mjerim, se i vetmi vizion për këto treva ka qenë KANABIZIMI dhe FASADAT.

Përtej përçmimit të Edi Ramës për veriun dhe Kosovën, diskriminimi në investime madhore ka qenë prezent përgjatë 12 viteve.

Segmenti Milot-Rrëshen nyje jetike e Rrugës së Kombit nuk u zgjerua, e për pasojë çdo vit merr jetë njerëzish në aksidente fatale dhe instancat vetëm mbledhin kufomat.

Segmenti rrugor Milot-Balldre, ndër akset më të rëndësishëm në vend që lidh Shkodrën me Tiranën është lënë si rrugë rurale me vetëm dy korsi, duke pamundësuar rritjen e kapaciteteve ekonomike të dy prej qarqeve me dinamikë në vend.

Shëngjini zemra ekonomike e Lezhës dhe perla turistike e veriut vijon të jetë i izoluar për shkak të rrugës së lënë rrugëve.

Vizitorët çdo vit mendohen dy herë para se të vijnë në Shëngjin kur mendojnë makthin e trafikut, teksa qeveria në 12 vite nuk ishte kurrë në lartësinë e sipërmarrësve të trevës sonë.

Pas 11 Majit diskriminimi i rajoneve të vendit tonë të vogël do jetë histori e së shkuarës që nuk do përsëritet kurrë më.#GG#.