Balliu: I deleguari i Bashës ka përfituar 11 milionë dollarë nga tenderat gjatë vitit 2021

Ish deputeti dhe anëtari i Komisionit të Rithemelimit të PD, Klevis Balliu ka denoncuar me dokumente se si kompania ‘Shkëlqimi 07’ në pronësi të të deleguarit të Bashës në Fier dhe Lushnje, Agron Kapllanaj ka përfituar 11 milionë dollarë nga tenderat e marrë vetëm gjatë vitit 2021.

I ftuar në Syri tv Balliu i ka bërë thirrje SPAK të fillojë hetimet lidhur me këtë denoncim.

Balliu: Ajo që duket qartë nga kjo fushatë dhe që i intereson qytetarëve dhe vendit është se tani më është zyrtarizuar koalicioni mes Lulzim Bashën dhe Edi Ramës. Janë disa raste publike, si rasti i Lushnjes ku Taulant Balla i ka bërë thirrje qytetarëve të votojnë kandidatin e Bashës, Indrit Sefa.

Pra sot është e qartë se një votë për Ramën është votë për Lulin dhe një votë për Lulin është një votë për Ramën. De fakto sot kemi një bashkëpunim politik dhe monetar.

I bëj thirrje SPAK të fillojë hetimet, pasi në Bashkinë e Lushnjes ka një punim i cili nuk ka asnjë transparencë se kush po ndërton, kush po e financon këtë projekt. Është e qartë se është asfalt elektoral dhe banorët janë duke u tallur me këtë fakt sepse PS-ja e drejtuar bashkinë prej 15 vitesh. 9 vite ka edhe bashkinë dhe qeverinë dhe është e qartë se ai llum dhe ai krim që i është bërë banorëve nga socialistët qoftë në bujqësi, në arsim, duke i hequr gjykatën, duke i rritur taksat fermerëve, ku janë pa rrugë dhe pa drita dhe ata paguajnë taksa për këto shërbime që nuk i marin.

Dhe qytetarët e kanë të qartë se tani kanë gjetur zgjidhje te kandidati i Shtëpisë së Lirisë, Elton Bano, i cili është një frymë e re.

Një nga fakte që ka një bashkëpunim mes kandidatëve të Bashës dhe Ramës është bashkëpunimi në Bashkinë Lushnje ku është ngritur një ekip i përbashkët i Lulit dhe Ramës, ku zoti Kapllanaj është duke mbështetur Indrit Sefën dhe do të ‘rrëzojë’ sot Eriselda Sefën por ka marrë tendera nga Eriselda Sefa.

Kompania ‘Shkëlqim 07’ ka marrë tendera në Bashkinë Lushnje në periudhën 16/12/ 2021 me vlerë 100 milionë lekë.

Por ka tjetër tender nga Bashkia Prrenjas e PS-së ku kompania ‘Shkëlqim 07’ ka marrë një tender 7/12/ 2021 me vlerë totale 430 milionë lekë.

Bashkia Këlcyrë i ka dhënë tender kompanisë ‘Shkëlqim 07’ me vlerë 440 milionë lekë në 22/10/2021.

ARRSH ka lidhur kontratë me kompaninë ‘Shkëlqimi 07’ 16/ 9/ 2021 me drejtorinë e Ujitjes dhe Kullimit Durrës me vlerë 48 milionë lekë.

Tjetër tender ka marrë kjo opozitë, në Bashkinë Berat, kompania ‘Shëlqimi 07’ ka lidhur kontratë me vlerë 160 milionë lekë me TVSH.

Bashkia Dimal, kompania ‘Shkëlqimi 07’ ka marrë tender me vlerë 540 milionë lekë.

Bashkia Durrës ka dhënë tender me 330 milionë lekë në datë 14/5/ 2021 për kompaninë 'Shkëlqimi 07' pas zgjedhjeve të 25 prillit. Meqë ishte mërzitur zotëria i dhanë një tender për ta zbutur pak.

Kemi një tender me Albpetrol me 100 milionë lekë me Shkëlqimi 07.

Kemi dhe një tender në Bashkinë Gramsh prej 220 milionë lekësh me kompaninë ‘Shkëlqimi 07’.

Dhe një tjetër tender në Bashkinë Kavajë me vlerë 342 milionë lekë për kompaninë ‘Shkëlqimi 07’.

8 tendera më vlerë 11 milionë dollarë janë marrë nga kompania 'Shkëlqimi 07' vetëm në vitin 2021.