Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Opozitës

Berisha: Demokratët kanë faktuar në historinë e këtij vendi, se të pamundurën e bëjnë të mundur

Politiko 18 Janar 2026, 19:16

Berisha: Demokratët kanë faktuar në historinë e këtij
Kryetari i Partisë Demokratike, Sali Berisha, deklaroi se demokratët dhe qytetarët shqiptarë janë përballur historikisht me regjime represive, por kanë dëshmuar vazhdimisht se janë të pamposhtur dhe se arrijnë të kthejnë të pamundurën në të mundur.

Duke iu referuar historisë së vendit, Berisha theksoi se diktatura e parë komuniste ishte më mizorja në Europë, duke pushkatuar mbi 7 mijë shqiptarë, duke internuar mbi 40 mijë të tjerë dhe duke persekutuar më shumë se 100 mijë qytetarë. Sipas tij, pasardhësit e atij regjimi kanë ndërtuar një “diktaturë të dytë”, e cila në kushte të reja ka detyruar mbi 1.1 milionë shqiptarë të largohen nga vendi në vetëm një dekadë.

“Ky regjim ka shndërruar drejtësinë në armë politike, e ka përdorur kundër opozitës dhe pluralizmit, ka grabitur zgjedhjet dhe i ka kthyer ato në një fasadë. Shqipëria sot qeveriset si nga një pushtues i keq, që sillet me pasuritë publike dhe buxhetin e qytetarëve si me plaçkë lufte,” u shpreh Berisha.

Ai theksoi se pasojat e këtij modeli qeverisës kanë varfëruar qytetarët, duke e zbritur Shqipërinë në fund të rajonit për paga dhe pensione, ndërsa kanë krijuar një klimë dëshpërimi dhe lodhjeje shoqërore.

Megjithatë, Berisha u bëri thirrje demokratëve dhe qytetarëve të mos dorëzohen. “Geni i demokratëve është geni i njerëzve të pamposhtur. Në historinë e këtij vendi, burrat dhe gratë demokrate kanë dëshmuar se janë besnikë ndaj vlerave dhe të vërtetës,” tha ai.

Duke rikujtuar vitin 1991, Berisha theksoi se Shqipëria u përball me ndërtimin e një rendi të ri pa asnjë përvojë apo njohuri, por me vullnet dhe ideale që u shndërruan në energji të pashtershme për transformimin e vendit. Ai përmendi gjithashtu krizën e vitit 1997, duke theksuar se pavarësisht gabimeve, Partia Demokratike u ringrit me moral dhe me të vërtetën, duke refuzuar të mashtrojë qytetarët për skemat piramidale.

PJESE NGA DEKLARATA

Miq, diktatura e parë totalitare ishte më mizorja në Europë. Ata që e kanë jetuar, ose që kanë lexuar për të, e kanë të qartë, ajo pushkatoi me gjyq dhe pa gjyq, si kundërshtarë politikë mbi 7 mijë shqiptarë, internoi mbi 40 mijë tjerë dhe persekutoi mbi 100 mijë. Pra, në këtë aspekt ai ishte regjimi më mizor i Europës. Diktatura e dytë e pasardhësve të tyre, në kushte të reja, përzuri në 10 vite nga Shqipëria, vetëm në hapësirën europiane 1.1 milionë shqiptarë. Diktatura e dytë me plaçkitjet ndaj shqiptarëve bëri që, qytetarët shqiptarë për herë të parë në historinë e tyre ngritën kokën dhe arriën të paguhen më mirë se kombet e tjera të rajonit, të zbresin me shpejtësi në vendin e fundit për rrogat dhe pensionet. Diktatura e dytë, bëri që drejtësia e tëra të shndërrohet në armë politike, të përdoret kundër opozitës dhe kundër pluralizmit politik, t’i japë licencë qeverisë për plaçkitjen e zgjedhjeve, bëri që zgjedhjet të jenë krejtësisht një fasadë.
Shqipëria pra, qeveriset nga një regjim që sillet ndaj pasurive të qytetarëve shqiptarë, buxhetit të tyre dhe aseteve publike, njëlloj si një pushtues i keq.
Këto janë kushtet, këto janë shkaqet pse ju jeni të lodhur, pse janë njerëzit të mërzitur, të dëshpëruar.
Por, një gjë miq, ju ftoj ju, ftoj çdo demokrat, ftoj çdo qytetarë të mos harrojë se geni ynë, geni i demokratëve, është geni i njerëzve të pamposhtur.
Demokratët janë ata burra dhe gra, djem dhe vajza që në mënyrë të përsëritur në historinë e këtij vendi kanë faktuar se të pamundurën e bëjnë të mundur plotësisht.
Ata kanë faktuar se janë dhe mbeten besnikë të vlerave që besojnë, të vërtetave që besojnë. Imagjinoni ju, ku ishim ne në vitin 1991, që duhet të ndërtonim një rend të ri? Cilat ishin njohuritë tona për rendin e ri? Inekzistente.
Por, vullneti dhe idealet tona ishin energji e pashtershme për të mësuar, për t’i zbatuar, për të transformuar Shqipërinë dhe e realizuam atë me vendosmërinë më të madhe. Një krizë e thellë pllakosi vendin edhe për gabimet të PD në vitin 1997. Menduan se kjo parti do të vidhisej në honet e historisë, do t’i harrohej emri, por jo. Rikujtoni pak se si u ngritëm? Po pse u ngritëm ne? Ne u ngritëm, jo se nuk kishim bërë gabim, por se u ngritëm të vendosur të korrigjojmë gabimin, u ngritëm me moral se ato borxhe që na i atribuonin, nuk i kishim, se qeveria nuk kishte prekur një qindarkë nga skemat piramidale. U ngritëm se, në kulmin e rebelimit, pavarësisht çmimit që mund të kishte, ne u thamë shqiptarëve të vërtetën: ne paratë nuk mund t’i kthejmë, sepse nuk mund të marrim paratë e atyre që nuk kanë vendosur në skema piramidale, t’i shpërndajmë për ata që kanë vendosur. Që në atë moment, ne kryenim një krim dhe turp, që nuk e merrnim kurrë për bazë.
Këto qenë arsyet, pse shqiptarët na rikthyen ne, na votuan masivisht në vitin 2001. Qemë të vërtetë. Ju kujtohet, kur e filluam protestën tonë me 30-50 vetë gjithësej.
E mbani mend?
Nuk u tërhoqëm, vazhduam në të drejtën tonë gjersa arritëm në fitore.

ZYRA E MEDIAS DHE KOMUNIKIMIT, PARTIA DEMOKRATIKE