Berisha: Duke sulmuar Kushtetuesen, Rama po fakton se është hajduti kryesor i aferës së Llogarasë

Kryedemokrati  Sali Berisha, nga foltorja para Kryeministrisë, akuzoi kryeministrin Edi Rama se po sulmon Gjykatën Kushtetuese për të mbrojtur veten dhe zëvendëskryeministren Belinda Balluku, tashmë nën hetim për aferën e tunelit të Llogarasë.

Berisha deklaroi se dokumentet e SPAK që flasin për një dëm prej 50 milionë eurosh “kanë zhveshur lakuriq hajdutin më të madh të të gjitha kohërave”, duke pretenduar se Rama po e mbron Ballukun, sepse “urdhrat dhe përfitimet kanë qenë të përbashkëta”.

Sipas tij, deklaratat e kryeministrit kundër Kushtetueses për pezullimin e Ballukut janë “prova më e qartë se ai është përgjegjësi kryesor i aferës”. Berisha shtoi se Rama “i tregon bërrylin drejtësisë” dhe po përpiqet të bllokojë çdo hetim që prek qeverinë.

Pjese nga deklarata

Mirëmbrëma dhe përshëndetjet më të përzemërta ju, opozitareve dhe opozitarëve në këtë shesh që ne e kemi pagëzuar Sheshin e Lirisë.

Në këtë shesh, i cili është sheshi i misionit të madh, të burrave dhe grave, djemve dhe vajzave guximtarë për të përzënë nga pallatet e krimti një bandë, e cila është zhytur në krim, në vjedhje, ndër më të rëndat në historinë e këtij kombi.

Miq, në ekzistencën tonë të gjatë ne kemi njohur shumë pushtime, kemi njohur diktatura dhe mynxyra, por kurrë ndonjëherë nuk kemi shkuar brenda 10 viteve 100 vite mbrapa siç kemi shkuar këto vite.

Kurrë ndonjëherë nuk kemi humbur ne mbi 45 përqind të materies kombëtare siç kemi humbur këto 10 vite.

Asnjëherë nuk jemi varfëruar më shpejt se këto 10 vite.

Asnjëherë nuk ka pasur një klikë, një grup kaq antishqiptar në çdo aspekt sa ç’kemi sot.

Ne jemi dëshmitarë këto ditë të një krize ndër më të paimagjinueshmet.

Një krize, e cila zhveshi lakuriq para shqiptarëve hajdutin më të madh të kombit shqiptar të të gjitha kohërave, Edi Ramën.

U desh akuza e bazuar në dokumente zyrtare të vjedhjes së 50 milionë euro nga zëvendëskryeministrja, për të bërë që Edi Rama t’u thotë shqiptarëve se hajduti jam unë, se paratë i kam marrë unë dhe se drejtësisë i tregoj bërrylin dhe nuk e lejoj të veprojë.

Nuk ka ndodhur kurrë kjo, as mbret, as perandor, as diktator, as kryeministër, që t’i lejojë vetes një akt të tillë.

Cilido do kishte vetëm një rrugë, largimin e menjëhershëm. Por nuk e largon dot se paratë i ka marrë ai, se vjedhja është bërë me urdhër të tij, se paratë i kanë ndarë së bashku dhe se kjo është vetëm një sasi e vogël e tyre.

Edi Rama ka dy ditë që ka humbur çdo gjë dhe në një përçartje të neveritshme del merr në mbrojtje haptas, po mbroj ministren, nuk po mbroj Lubinë.

Po mbroj kryeministrin, nuk po mbroj Edvinin.

Po të dy jeni hajdutë mor, ku ka hajdutë si ju.

Po ti atë që bën kundër Gjykatës Kushtetuese, fakton se ti je hajduti kryesor i kësaj afere.

Pra, le t’u drejtohemi bashkë shqiptarëve, çfarë do bëjmë ne të dashur qytetarë, të dashur bashkëatdhetare kudo që jeni?

Do pranojmë ne të vazhdojmë të vidhemi nga një kusar që nuk ka asnjë normë morale, që kërkon të bllokojë edhe vendimin e gjykatës, apo nuk do i ndahemi atij gjer ditën e fundit të largimit nga pushteti.

E dyta është misioni ynë.