Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Opozitës

Berisha: E gjithë bota pret nga PD zgjidhje për situatën dramatike në Shqipëri

Politiko 15 Janar 2026, 14:04

Berisha: E gjithë bota pret nga PD zgjidhje për situatën

Kreu i Partisë Demokratike, Sali Berisha, deklaroi se Shqipëria ka hyrë në vitin e ri në një situatë dramatike, ndërsa sipas tij, e gjithë bota dhe miqtë e vendit në Europë presin nga PD dhe opozita shqiptare zgjidhjen përfundimtare të kësaj krize.

Gjatë fjalës së tij para deputetëve demokratë, Berisha akuzoi qeverinë se po drejton vendin si një “klikë e papërgjegjshme dhe organizatë kriminale”, që sipas tij vjedh qytetarët dhe bashkëpunon me kartelet më të rrezikshme të drogës në Europë dhe botë.

Ai u ndal veçanërisht te përmbytjet masive që kanë prekur vendin në fillim të vitit, nga Gjirokastra në Shkodër, me situatën më të rëndë në qarkun e Durrësit. Berisha theksoi se përmbytjet kanë qenë të papara më parë dhe me pasoja të rënda për mijëra familje.

“Shteti jo vetëm që nuk ishte pranë qytetarëve, por me korrupsionin e tij ishte shkaku kryesor i kësaj katastrofe”, u shpreh Berisha, duke shtuar se bashkë me banesat u “përmbyt edhe morali i kalbur i kësaj qeverie”.

Sipas tij, ndërsa qytetarët përballeshin me ujin në shtëpitë e tyre, qeveritarët vijonin ahengjet dhe udhëtimet, duke shpërfillur dramën sociale. Berisha theksoi se në çdo vend normal ndërtohet infrastrukturë kundër përmbytjeve dhe se emergjencat civile kanë përparësi absolute në sigurinë kombëtare.

Ai solli në vëmendje edhe zjarret e verës, duke akuzuar qeverinë për mashtrim me projektin e satelitëve, që sipas tij nuk shërbyen për parandalimin e fatkeqësive, ndërsa korrupsioni “i verboi” institucionet.

PJESE NGA DEKLARATA

Së pari edhe unë përzemërsisht u uroj përsëri ju të gjithë atyre që u kanë votuar ju dhe mbarë shqiptarëve një vit në lartësinë e pritshmërive më të mira që kemi.
Të nderuar deputete e deputetë, ne nisim këtë vit kur të gjithë shqiptarët, të gjithë miqtë e Shqipërisë në Europë dhe në botë presin nga PD, presin nga opozita shqiptare zgjidhjen e situatës dramatike në Shqipëri.
Zgjidhjen përfundimtare të kësaj situate, e cila si në asnjë vend tjetër, një vend anëtar i NATO-s, një vend që pretendon se po ecën drejt BE, faktohet para qytetarëve të saj dhe mbarë botës një klikë e papërgjegjshme, një organizatë kriminale që vjedh ditë e natë qytetarët e saj.
Një organizatë kriminale që bashkëpunon me kartelet më të rrezikshme të drogës në Europë dhe në botë.
Shqiptarët e nisën këtë vit në shumë zona të vendit, nga Gjirokastra në Shkodër, por veçanërisht në Durrës dhe qarkun e Durrësit, në një përmbytje të përmasave të papara ndonjëherë.
Në një përmbytje me pasoja të rënda.
Në një përmbytje në të cilën shteti jo që nuk ishte një mbështetje për qytetarët, por shteti me korrupsionin e tij të çmendur, të papërmbajtur, ishte shkaku i thellë i kësaj përmbytje të paparë ndonjëherë në qarkun e Durrësit, por edhe në disa qarqe të tjera.
Në fakt, në ujërat që përmbytën mijëra e mijëra banesa, nga veriu në jugun e vendit, u përmbyt gjithashtu morali i kalbur i kësaj qeverie.
Shqiptarët panë se si këta gobsekë vazhdonin ahengjet, udhëtimet, ndërkohë që ujërat shtoheshin çdo ditë në shtëpitë e tyre.
Shqiptarët panë me sytë e tyre shkaqet e vërteta të kësaj drame që pësuan dhe që edhe sot janë në të.
Në çdo vend dhe çdo qeveri në botë, ndërtohet një infrastrukturë kundër përmbytjeve.
Dhe në ligjin e sigurisë kombëtare, emergjenca ndaj fatkeqësive natyrore ka një përparësi absolute.
Pra, Shqipëria u dogj sa asnjëherë tjetër në historinë e saj.
Satelitët e Peleshit mbushën xhepat e Edi Ramës.
Firmosja e një marrëveshje se na duhen satelitët për të parë vatrën e parë të zjarrit që të shkojmë dhe ta fikim menjëherë, ky mashtrues i paskrupullt, i pamoral, zjarret dogjën njerëz të gjallë, dogjën familje, shtëpi si asnjëherë tjetër, dhe satelitët i verboi korrupsioni.