Berisha: Çështja Salianji çështje ndërkombëtare, e sanksionuar në 3 rezolutat më të fuqishme

Kreu i PD, Sali Berisha foli për mediat nga Fieri ku zhvilloi një vizitë në burgun ku po vuan dënimin demokrati Ervin Salianji.

Teksa tregoi se si shkoi vizita dhe takimi i tij me Salianjin, Berisha u pyet nga gazetarët nëse mendon të largohet nga politika në rast se në zgjedhjet e 11 majit nuk bëhet rotacioni.

“Përmbysja e diktaturës është misioni për të cilin unë zotohem gjerë në orën e fundit të jetës sime. PD ka marrë mision të ri përmbysjen e diktaturës së dytë në Shqipëri, një diktaturë e bazuar në krim, drogë dhe vjedhjen e shqiptarëve”, ishte përgjigja e Berishës.

Berisha tha se cështja Salianji çështje ndërkombëtare, e sanksionuar në 3 rezolutat më të fuqishme

Berisha: Mos dëgjo papagajtë e diktaturës, të lutem zonjë e nderuar. Çështja Salianji, është sot çështje e ndërgjegjes të mbarë qytetarëve të lirë në botë. Çështja Salianji, është e sanksionuar në 3 rezoluta ndërkombëtare, më të fuqishmet, të votuara për një vend, në të cilën Shqipëria damkoset si narkoshtet, damkoset si shteti i burgosjeve politike, si shteti në të cilën krimi dhe shteti janë sipërmarrje e përbashkët.

Vijmë te ajo tjetra.

Në mënyrë absolute Drejtësia, do të kishte mbështetjen më të fuqishme të PD, si parti e shtetit ligjor, në qoftë se kjo Drejtësi nuk do të bëhej një mashë e vërtetë politike.

A mund të ndryhet, marrim në rastin konkret Ervin Salianjin, me akuzën se ka bërë kallëzim të rremë, në një kohë kur, në jetën e tij ky nuk ka bërë kurrë kallëzim? Ky njeri nuk ka bërë kallëzim. Ky njeri, si deputet ka bërë denoncim publik në parlamentin shqiptar.

Drejtësia shqiptare është një mashë në duart e diktaturës. Dhe nuk jam unë që e them. Tani, janë 3 rezoluta bbotërore, të të gjitha partive politike të qendrës së djathtë të globit, përfshi partinë që vjen për 3 javë në pushtet në SHBA, Partinë Republikane, partitë e mëdha, Partinë Demokristiane gjermane, partitë e mëdha të Europës dhe botës.

Tani, është e sanksionuar që, Shqipëria ka një Drejtësi të kontrolluar totalisht nga ekzekutivi. Ka një Drejtësi, e cila me qendrimet ndaj krimit elektoral është palë në bllokimin e rotacionit. Ka një drejtësi pra, degë ekzekutivi.

Nuk është ky, vlerësim i Sali Berishës, është vlerësimi i Qendrës Ndërkombëtare Demokrate, është vlerësimit i Bashkimit Demokrat Ndërkombëtar. Është vlerësimi i PPE.

Pra, 3 organizata që: njëra grupon 108 parti, tjetra 87 parti, tjetra 83 parti.