Berisha: Me të ardhur në pushtet, Rama nisi betejën me artin e kulturën, shkatërroi Teatrin Kombëtar

Kreu i demokratëve, Sali Berisha ka zhvilluar një takim me ekspertë të huaj për të prezantuar programin e qeverisjes 2025-2029 për kulturën.

Berisha tha në takim se qeveria Rama ka faktuar se në realitet është një antirilindje për kulturën dhe artet. Kryedemokrati u shpreh se Tirana sot është i vetmi kryeqytet në botë pa një teatër kombëtar, që ka një galeri artesh të shndërruar në magazinë dhe ku libri tatohet.

Berisha deklaroi se Rama, me ardhjen në pushtet, i shpalli lufte artit dhe kulturës.

“Çështja e kulturës e arteve është çështje e identitetit të kombit. Është çështje e një rëndësie jetike për të sotmen dhe të ardhmen e tij.

Është bërë tashmë e njohur se ajo që erdhi si rilindje në vitin 2013 është faktuar si antirilindje në tërësi, por mbi të gjitha për kulturën dhe artet.

Një njeri, që ka studiuar arte, në një mënyrë ose në një tjetër, një artist i dështuar, realiteti i tij, që nuk kishte hapur një ekspozitë përpara se të bëhej kryeministër, por që kishte vjedhur dhe shitur vepra artistike, ikona mesjetare me vlerë kolosale, me të ardhur në pushtet, betejën e tij e nisi me artin, me kulturën.

Nisi një betejë ndër më të egrat, betejë në të cilën zhduku ose pothuajse asgjësoi të gjitha institucionet kryesore artistike të artit, përveç Teatrit të Operas që ka shpëtuar gjer sot. Edhe aty ka futur duart.

Sot, Tirana është i vetmi kryeqytet në botë pa teatër kombëtar, në një kohë kur kishte një teatër 100—vjeçar.

Sot, Tirana është një qytet që ka një galeri artesh të shndërruar në magazinë, ku piktorët nuk mund të ekspozojnë veprat e tyre.

Sot fëmijët nuk kanë një teatër, siç e kishin gjer dje për dekada e dekada.

Sot, libri tatohet në mënyrën më të pamëshirë.

Muzeu mbyllet për ‘rikonstruksion’ me qëllimin e vetëm për të vjedhur 10-12 milionë euro dhe për të ndërtuar një kullë në oborrin e tij.

Si në asnjë vend tjetër të botës, artistët bënë përpjekje heroike, përpjekjet më të mëdha për të mbrojtur teatrin, në protestën më të gjatë qytetare të regjistruar ndonjëherë.

Në qoftë se shqiptarët do lexojnë fjalën që ka mbajtur Edi Rama në Këshillin e Ministrave fill pas shkatërrimit të teatrit nën drejtimin e kryetarit të bashkisë, do shohin se ai është autori i vërtetë i shkatërrimit të Teatrit Kombëtar.

Kombi ndahej me gjeniun e letrave dhe ky zihej në fjalim me Blendi Fevziun sepse ai kishte propozuar t’i përzgjidhet një vend më i veçantë nderi shkrimtarit që meritonte çdo nderim.

Pra, i kërkoj ndjesë Helenës se mbase nuk i vjen mirë t’ia rikujtoj këtë moment, por Ismaili ishte shkrimtar mbarëkombëtar dhe ai fjalim ishte fyerje për çdo shqiptar.

Një publicist, një studiues, bëri përsipër të bëjë një propozim pa asnjë qëllim të keq, por thjesht një detyrim që ndjente ai ndaj shkrimtarit të madh”, deklaroi Berisha.