Berisha: Pavarësia e Shqipërisë i vuri fuqitë e mëdha para faktit të kryer, ishte shtet sovran dhe i pavarur

Në kuadër të 111-vjetorit të Pavarësisë të Shqipërisë, kryedemokrati Sali Berisha, ka organizuar eventin “Krenaria e Trashëgimisë”: Një udhëtim në kohë në selinë e Partisë Demokratike.

Në fjalën e tij, Berisha theksoi se Pavarësia e Shqipërisë është ditëlindja moderne e një kombi dhe ditë frymëzimi. Kryedemokrati e cilësoi Ismail Qemalin një burrë vizionar që i vendosi fuqitë e botës para faktit të kryer se Shqipëria ishte një shtet i pavarur dhe sovran.

"Theksoj edhe njëherë, pavarësia është ditëlindja moderne e një kombi. Është ditë frymëzimi sepse në kushtet kur Ismail Qemali dhe etërit e tjerë të pavarësisë, shpallën në Vlorë, pavarësinë e Shqipërisë, ai ishte një akt i guximit, vizionit të jashtëzakonshëm.

Ishte një akt kur nga të gjithë fuqitë e mëdha, përveç njëra, të gjithë ishin kundër. Askush nuk donte përveç Austro-Hungarisë dhe kontit Bertold, një shtet të pavarur në trojet e tij. Qeverinë e Ismail Qemalit nuk e njohën gjer në gusht të vitit 1913.

Por nëse ky burrë i madh, vizionar, nuk do të ngrihej me një guxim mbi kohën, së bashku me Isa Boletinin dhe elitën tjetër të kombit, të shpallte në Vlorë pavarësinë, gushti i 1913 do të kishte vendosur shpërbërjen, copëtimin përfundimtar të kombit shqiptar.

Ismail Qemali i vendosi fuqitë e botës, që nuk donin një shtet shqiptar, para faktit të kryer, se shteti shqiptar ekzistonte, se Shqipëria ekzistonte si shtet sovran dhe i pavarur.

Në këtë kontekst po të shkojmë pas në ato kohëra dhe të mendojmë këtë akt, ky akt kalon në një legjendë të vërtetë.

Por ky akt u bë vendimtar për fatin e kombit, asokohe të ndarë dhe të pushtuar pothuajse në 2/3 e trojeve të tij. Ky akt ka qenë përcaktues për Kosovën e lirë dhe të pavarur.

Pa pavarësi të Shqipërisë nuk do të mund të kishte kurrë, pavarësi të Kosovës. Pa pavarësi të Shqipërisë, shqiptarët kudo që jetojnë në vendet e tjera në Ballkan nuk do të mund të ishin ata që janë sot.

Ndaj dhe nëse kombet e tjera e kanë pavarësinë edhe si dhuratë, apo e kanë ndonjëherë edhe si aksident të historisë, shqiptarët e kanë nga një akt mbinjerëzor i Ismail Bej Vlorës dhe elitës së kombit. I atyre luftëtarëve, politikanëve, udhëheqësve popullor, që organizuan kryengritjet e mëdha të Kosovës.

Pra sa më shumë të ndalesh në pavarësinë tonë, ta mendosh, studiosh, lexosh, aq më mahnitëse, mrekulli, magjepsëse dhe më frymëzuese bëhet ajo", deklaroi Berisha.