Berisha: Rama merrte energji nga Kosova dhe e shiste në treg, nga ana tjetër zbrazte digat

Kryedemokrati Sali Berisha akuzon qeverinë se ka abuzuar me rritjen e çmimit të energjisë elektrike.

Gjatë një takimi me sindikatat, Berisha tha se energjia në vendin tonë nuk ka asnjë lidhje me luftën në Ukrainë, me thatësirën, apo çmimin e naftës, siç pretendohet pasi sipas tij 99% është ujore.

Berisha tha se kryeministri Rama merrte energji nga Kosova dhe e shiste në treg, ndërsa nga ana tjetër zbrazte digat.

"Absolutisht energjia elektrike në Shqipëri, ka vetëm një shkak, vjedhjen dhe vetëm vjedhjen. Nuk ka asnjë lidhje me luftën në Ukrainë, asnjë lidhje me thatësirën, apo çmimin e naftës, pasi 99% është ujore, është e tëra vjedhje.

6 mujorin që kaloi, HEC-et private kanë prodhuar 54% të të gjithë energjisë së vendit. Çfarë do të thotë kjo. Kjo do të thotë se prodhimi i energjisë në Shqipëri është mbi dyfishuar, falë HEC-eve private. Çfarë bëjnë këta? Merr e zbraz digën, e shet energjinë, sic ka ndodhur në realitet me 40 euro megavatin dhe ky tregtari që e blen me 40 euro megavatin, e shet këtë energji me 130 euro dhe ndan paratë me qeveritarët. Kjo është reale.

Ka një bursë ku është çmimi, shitet dhe blihet energjia. Në një kohë kur në bursë çmimi është 80 euro, KESH blen energji me 280 euro. Çfarë bëjnë këta, këta ndajnë para me thes njëri me tjetrin. Nuk ka energji thotë Rama, mashtrim e vetëm mashtrim.

Vitin e kaluar në Shqipëri janë prodhuar si kurrë në historinë e saj, 9 terravat. Shqipëria me gjithë konsumin dhe humbjet shkon në 7 terravat. Shqipëria është e bekuar nga Zoti në këtë aspekt, se ka burime ujore shumë më të mëdha. Këta e kanë shndërruar tregun e energjisë në një bixhoz. Nuk e dinë shqiptarët. Çfarë ka të bëjë luftë këtu? Zero.

Zbrazën digat gjatë muajit gusht në mënyrën më kriminale.

Kosova depozitoi, për pikë, energji piku, dhe i dha Shqipërisë 20 mln euro në muajin korrik.

Këta çfarë bënin. Këta zbraznin digat dhe shisni energjinë e Kosovës, kur ata e mirrnin për të ja kthyer Kosovës natën ose në një kohë të përshtatshme. Jo këta, zbraznin digat dhe energjinë e Kosovës e shisnin në pikun. Këta bëjnë një vjedhje gjigante të paimagjinueshme me energjinë e shqiptarëve", tha Berisha. 

Berisha premtoi se çmimin e energjisë për bizneset do të rikthejet në 6 lekë, aq sa ishte në qeverisjen e PD.

“Këta po i falimenton bizneset. Ne e kemi shitur energjinë me 6 lek për biznesin. E kanë çuar në 200, e tani do e çojnë në 400 lekë. Asgjë më vrasëse sidomos për ndërmarrjet nxjerrëse nuk ka se kjo. Pse e vendosëm ne atë çmim, 6 lekë. Edhe Gjermania e kishte 6 lek, por edhe vendet e tjera të zhvilluara çmimin e kishin rreth këtij çmimi.

Edhe biznesit të vogël, tani i rritet çmimi. Ju garantoj se çmimi i energjisë do të kthehet në 6 lekë, aty ku ka qenë”, tha kreu i PD.