Berisha: Rrustem Gjata hodhi bazat e drejtësisë kushtetuese në Shqipëri

Kryetari i Partia Demokratike e Shqipërisë, Sali Berisha, ka reaguar për ndarjen nga jeta të ish-deputetit demokrat dhe juristit të njohur, Rrustem Gjata.

Në një mesazh të publikuar në rrjetet sociale, Berisha e cilëson Gjatën si një prej civilistëve dhe konstitucionalistëve më të shquar të Shqipërisë, duke vlerësuar kontributin e tij të hershëm në radhët e opozitës dhe në themelimin e Partia Demokratike e Shqipërisë.

Sipas Berishës, Gjata ka luajtur një rol të rëndësishëm në ndërtimin e sistemit të ri ligjor pas rënies së diktaturës komuniste, si dhe në ngritjen dhe drejtimin e institucioneve të drejtësisë në vend. Ai kujton se Rrustem Gjata u zgjodh Kryetari i parë i Gjykata Kushtetuese e Shqipërisë, detyrë që e mbajti deri në vitin 1997.

Mesazhi:

Të dashur miq, dielli perëndoi përgjithmonë për Rrustem Gjatën, një prej civilistve dhe konstitucionalistëve më të shquar të Shqipërisë.

Ish-deputet i Partisë Demokratike dhe pedagog i respektuar, Doktor i Shkencave në Fakultetin e Drejtësisë, Rrustem Gjata do të ishte ndër juristët e parë që do të mbështeste dhe do të bashkohej me opozitën shqiptare dhe Partinë Demokratike që në hapat e parë të themelimit të saj.

Ai dha një kontribut të madh në zëvendësimin e legjislacionit të diktaturës komuniste me ligjet e reja, si dhe në udhëheqjen e institucioneve të reja të drejtësisë.

Rrustem Gjata u zgjodh nga Parlamenti si Kryetari i parë i Gjykatës Kushtetuese, të cilën e drejtoi me kompetencë dhe integritet të lartë që nga themelimi i saj deri në vitin 1997 – vit në të cilin ata që erdhën me dhunë në pushtet e larguan me një puç antikushtetues.

Përveç kontributit të tij në jurisprudencën e kësaj gjykate, që hodhi bazat e drejtësisë kushtetuese në Shqipëri, Rrustem Gjata është autor i një morie artikujsh, referencash e monografish në fushën e së drejtës, kryesisht të asaj private.

Monografitë e tij mbi të drejtën civile, pronësinë, detyrimet dhe kontratat, përgjegjësinë civile, dëmin kontraktor e jashtëkontraktor, janë një kontribut i vyer dhe udhërrëfyes për përgatitjen e qindra dhe mijra juristëve të rinj.

Duke shprehur respektin dhe vlerësimin tim të madh për kontributin e shquar të Dr. Rrustem Gjatës, i shpreh ngushëllimet e mia më të ndjera familjes së tij të nderuar dhe lutem së bashku me ta që shpirti i tij i mirë të gjejë paqen e merituar.

 

Ngushëllime, Sali Berisha!