Berisha: Sipas mundësive deputetët të udhëtojnë për takime me diasporën, kudo ku kanë lidhje të efektshme

Kryetari i Partisë Demokratike, Sali Berisha, në mbledhjen e grupit parlamentar të PD-së, theksoi rëndësinë e angazhimit të diasporës dhe emigrantëve shqiptarë në zgjedhjet e ardhshme. Ai njoftoi se është ngarkuar Jozefina Topalli si koordinatore kombëtare, e mbështetur nga një grup pune për koordinimin e përpjekjeve me emigracionin.

Berisha nënvizoi se fushata e PD-së do të bazohet në qindra takime modeste dhe jo në sallat luksoze të përdorura nga qeveria, duke kërkuar nga deputetët dhe mbështetësit të përfshihen aktivisht në këtë proces. Ai i bëri thirrje çdo anëtari dhe simpatizanti të trefishojë përpjekjet e tij, duke sjellë të paktën dy vota të reja nga diaspora.

Sipas tij, potenciali i votës së diasporës është i jashtëzakonshëm dhe shumica dërrmuese e emigrantëve janë kundër qeverisë aktuale, të cilën ai e akuzoi për krime dhe korrupsion. Berisha theksoi se përfshirja e komuniteteve shqiptare në vende si SHBA, Gjermani, Greqi, Itali, Britani, vendet nordike dhe Australia është thelbësore për suksesin e PD-së dhe aleatëve të saj.  

“Ne kemi ngarkuar si koordinatore kombëtare, Jozefina Topallin. Kemi ngarkuar dhe një grup që ta ndihmojë atë për koordinim zonjën Topalli. Por këto janë shumë të pamjaftueshme.

Grupi parlamentar, çdo deputet është i ftuar të koordinojë me qendrën këtu, çdo takim të mundshëm që mund të organizojë me emigracionin. Ne nuk i bazojmë takimet në salla të mëdha dhe luksoze se janë të kushtueshme. Ne matemi modestish dhe nuk duam ti rëndojmë as ata që të paguajnë paratë e buxhetit që përdor Edi Rama.

Kështu që ne do të bazojmë fushatën tonë në qindra e qindra takime ku secili prej jush aty ku ka lidhjet dhe mundësitë. Nuk ka, nuk ka, nuk do të thotë asgjë.

Por ne duhet ti qëmtojmë, ti gjejmë dhe gjatë kësaj periudhe të përparësojmë këto takime.

Së dyti, unë dhe në Berat e shtrova dhe ju duhet ta shtroni me çdo qytetar, me çdo mbështetës tonin, me çdo anëtar tonin. Secili duhet të marrë përsipër të paktën të trefishojë votën e tij, edhe me dy vota të tjera nga diaspora.

Ju garantoj se sa jemi këtu në sallë, 97 përqind e jona kanë të paktën 3 deri në 10 persona nga rrethi i vet, dhe kjo do të jetë një gjë shumë pozitive. Por nëse e bëjmë vetëm ne, kjo ndonjë gjë të madhe nuk sjell. Por nëse bindim çdo demokrat e demokrate, mbështetëse e mbështetës ta bëjë këtë, kjo sjell 2, 3 fishimin elektoratit tonë. 

Ka një urrejtje të madhe ndaj Edi Ramës dhe qeverisë. Kjo është e faktuar tashmë. Ka një luftë brenda llojit ‘të shpëtojë ai që të mundet’. Janë kthyer në një lukuni ujqërish që duan të shqyejnë njëri-tjetrin për krimet që kanë kryer, së bashku apo veçmas. 

Këto janë avantazhet tona, që ti shpjegojmë, paraqesim alternativën dhe shansin historik të çdo shqiptari që të ndihmojë vendin e tij me 11 maj.

Kështu që do bëni edhe me grupet sipas mundësive që keni, të organizohen grupe deputetësh, 4-5-6 mund të shkojnë  në SHBA, vetëkuptohet me shpenzime personale, se ky është buxheti. Të tjerë mund të shkojnë në Gjermani, Greqi, Itali dhe kudo ku keni lidhjet më të efektshme. Përdorni klubet, lokalet e shqiptarëve. Përdoren siç e bënë ata, sallë shkolle në Britaninë e Madhe, përdoren gjëra me çmime të përballueshme.

Mendoj se kjo fushatë duhet të përfshijë të gjithë botë, aty ku kemi komunitete që njohim më shumë. Në vendet nordike, kudo. Në Australi, është një komunitet shqiptar i jashtëzakonshëm i organizuar në mënyrë të shkëlqyer. Kanë edhe kryeministrin me origjinë shqiptare tani. E kanë.

Them që ne të bëjmë gjithçka dhe të përgatisim në këtë mënyrë, fitoren e thellë të opozitës shqiptare. Të PD-së dhe aleatëve të saj.

Aleatët  e PD, edhe ata të përfshihen në këto grupe sipas njohjeve dhe mundësive.

Në zonat elektorale çdo eksponent, mbështetës tonin, që ju e dini se ka lidhje të fuqishme në këtë apo në këtë qytet jashtë shtetit me shqiptarë, në këtë apo atë vend, edhe atij do i bëni thirrje vullnetarisht të organizohet dhe të shkojë, thirrje nxitje në diasporë.

Ne kemi krijuar një uebsite, ka filluar të funksionojë edhe ajo si nënfaqe e PD”, tha Berisha.