Berisha zbardh skemën si vidhte Agasi dhe Frangu: Gjithçka nisi me vendimin e Ramës në 2017, miliona euro abuzime

Kreu i Partia Demokratike, Sali Berisha, ka denoncuar atë që e cilëson si një skemë abuzimi me tenderat në fushën e teknologjisë së informacionit, duke përfshirë emra të njohur pranë qeverisë.

Në një deklarate  për shtyp, Berisha akuzon kryeministrin Edi Rama se, përmes një vendimi të vitit 2017, ka centralizuar të gjitha prokurimet në fushën e IT tek AKSHI, duke krijuar sipas tij mundësi për abuzime të mëdha financiare.

Sipas Berishës, biznesmenët Ergys Agasi dhe Armand Frangu kanë qenë përfitues kryesorë të këtyre procedurave, ndërsa pretendon se janë vendosur tarifa të paligjshme dhe ryshfete të majme për fitimin e tenderave.

“Ergys Agasi në çdo hap përfaqësonte Ramën dhe ishte vetë Rama. Në një rast, një shtetase shqiptaro-gjermane, e cila paraqet ofertë pikërisht në fushën ku ishte absolut Armand Frangu, në fushën e pajisjeve kompjuterike për shkollat, dhe kjo kalon një proces kafkian.

Kjo zonja. Dhe në fund për të shpëtuar, për të dalë nga ai proces, paguan edhe 1 milion dollarë ryshfet. Kurse Rama i AKSHI-t ose Ergys Agasi, pasi rregullonte tenderat, merrte për to minimumi 1 milion euro gjobë dhe bëri në një vit 11 milionë euro.

Historia e suksesit, thotë Rama, sepse paratë janë të Ramës, ndahen me Ramën. Përveç sa vidhte Armandi, që mori për inteligjencën artificiale 75 milionë euro dhe ajo nuk ekziston. Inteligjenca artificiale e Armand Frangut është identik me djegësin e Tiranës, as nam as nishan nuk ekziston.”

Ai përmend raste konkrete, duke pretenduar se një shtetase shqiptaro-gjermane ka paguar ryshfet për të dalë nga një proces tenderimi, ndërsa shton se në një vit janë përfituar miliona euro nga këto skema.

Berisha gjithashtu ka ngritur dyshime mbi investime të mëdha në teknologji, përfshirë një projekt për inteligjencën artificiale me vlerë dhjetëra milionë euro, për të cilin pretendon se nuk ekziston në praktikë.

“Por nuk mjaftnin këto, por edhe të tjerë duhet të paguanin ryshfete të majme, milionëshe. Pse kjo dhe si ka mundësi?

Po, tenderat në fushën e high tech janë tenderat në të cilat mund të spekulohet në mënyrën më të jashtëzakonshme. Në këtë fushë, mund të luhet me çmimet në mënyrë të paimagjinueshme.

Urdhëroni, tenderi 75 milionë euro për përmirësimin e inteligjencës artificiale që nuk ekziston.”

Në deklaratë përmendet edhe ish-zëvendëskryeministri Arben Ahmetaj, për të cilin thuhet se ka paraqitur dokumente që, sipas Berishës, tregojnë fryrje të çmimeve në furnizimet me pajisje kompjuterike për shkollat.

Sipas kreut të PD-së, centralizimi i tenderave në një institucion të vetëm ka krijuar, siç e cilëson ai, një “sistem të mbyllur” ku abuzimet janë bërë më të lehta dhe më të mëdha.

“Arben Ahmetaj ka paraqitur dokumente zyrtarë se si krye-peshkaqeni Armand Frangu, dhe u them medieve mos u trembni dhe damkosni Ramën, Lindën dhe kunatin e tyre, me fatura ka sjellë kompjutera për shkollat në Shqipëri dhjetëfishi i çmimit me të cilin ato shiten në dyqanin e shitjes me pakicë në Vjenë.

E kuptoni se çfarë ndodh në këtë fushë? Fitimet në këtë fushë janë më të mëdha se me kokainë. Në AKSHI është fjala. AKSHI është agjenci shtetërore. Si erdhëm këtu? Dora vetë Edi Rama.

Në vitin 2017, Edi Rama me një vendim të shkruar nga kunati i të shoqes, vendos që të gjitha tenderat në fushën e IT në Shqipëri të bëhen nga AKSHI.

Pra, Linda e Surrelit dhe kunati i saj, të bëheshin padronë të çdo prokurimi në fushën e IT, në të gjithë territorin e Shqipërisë.

Dhe kjo solli pastaj pishinën e peshkaqenëve apo kopshtin privat të Edi Ramës.”