“Betoni i Vangjush Dakos bën kërdinë”, PD: Vidhet rëra dhe shkatërrohet bregdeti në Durrës

Anëtarja e Këshillit Kombëtar Ilirjana Kuçana në një deklaratë për media tha se sh-kryebashkiaku Vangjush Dako, edhe pse nuk e ushtron më detyrën, duket se vazhdon të jetë vendimmarrësi kryesor në qytetin bregdetar, pasi betoni i kompanive të tij po mbush dhe shëmton çdo ditë e më shumë hapësirën bregdetare dhe po largon rërën nga plazhi.

Deklarata  e plotë:

Bashkia e Durrësit prej kohësh ka mbyllur sytë dhe veshët përballë asaj që po ndodh me bregdetin e këtij qyteti.

Çdo ditë, bregu po shkatërrohet nga ndërtimet pa kriter dhe më skandalozja, pa leje ndërtimore, mjedisore e zhvillimore.

Ajo që po ndodh me bregun në Durrës, nga Ura Dajlanit deri te Shkëmbi i Kavajës, nuk mund të kalojë vetëm me denoncime publike. Duhen dhe do të bëhen menjëherë kallëzime penale në Prokurori, ndaj subjekteve private që pa asnjë kriter po shkatërrojnë të gjithë zonën, por edhe për Bashkinë e cila jep viston, por nuk jep asnjë informacion për atë që ndodh në bregdet.

Sigurisht, ajo që ndodh në Durrës, gjithmonë e ka një shkaktar dhe një frymëzues.

Ish-kryebashkiaku Vangjush Dako, dhe pse nuk e ushtron më detyrën, duket se vazhdon të jetë vendimmarrësi kryesor në qytetin bregdetar, pasi betoni i kompanive të tij po mbush dhe shëmton çdo ditë e më shumë hapësirën bregdetare dhe po largon rërën nga plazhi.

Mbushja e hapësirës bregdetare me betonin e Vangjus Dakos dhe largimi i rërës përpara Hotel ‘Royal’, ku sipas qytetarëve të Durrësit është bashkëpronar pikërisht “betonierja Dako”, po dëmton edhe biznese të tjera të kësaj zone.

Disa pyetje publike për “turistët” në krye të Bashkisë:

A ka ndonjë leje ndërtimi nga bashkia Durrës, apo thjesht u janë marrë paratë e caktuara subjekteve, dhe më pas u është ‘dhuruar’ hapësira bregdetare?!

A ka studime për sedimentologjinë e kësaj zone, dhe sa dëme të pariparueshme shkakton derdhja e kësaj sasie betoni?

Nëse jo, atëherë vendimi i vlerësimit të ndikimit në mjedis është nul! Pa këtë vendim të vlerësimit të ndikimit në mjedis, nuk mund të merret një leje mjedisore dhe pa leje mjedisore nuk mund të jepet leje ndërtimi.

Problemi kryesor është masakra mjedisore që po ndodh në Durrës, qoftë me betonizimet e bregut edhe me pontilet e çmendura në zonën e Qerretit dhe Malit të Robit që kanë ndaluar transportin e lirë të rërës.

Betonizuesit e Durrësit janë duke luftuar me natyrën, duke ndërprerë proceset mijëravjeçare të sedimentologjisë për interes të xhepit të pak hajdutëve, dhe vjedhjes së milionave nga taksat e qytetareve për interesa të disa hajduteve të tjerë.

Më 11 maj durrsakët, të cilëve po u vidhet rëra dhe u këmbehet me beton, e kanë në dorë përgjigjen për kriminelët e mjedisit dhe të taksave të tyre.