Blushi: Inceneratori i Elbasanit, gropë që gëlltit miliona euro dhe lëshon helm për qytetarët!

Sekretari i Përgjithshëm i Partisë së Lirisë, Tedi Blushi, ka folur këtë të premte mbi zjarrin që ra në lanfillin e mbetjeve në Inceneratorin e Elbasanit. 

Në një deklarat për mediat Blushi u shpreh se inceneratori i Elbasanit është një aferë kriminale që po helmon qytetin duke pasuruar Edi Ramën, me lejen e SPAK-ut.

Blushi thotë se në vend që të kishim një incenerator funksional që pastron dhe menaxhon mbetjet sipas standardeve, kemi një gropë që vetëm gëlltit miliona euro dhe lëshon helm për qytetarët.

Ai shton se tymi që ngrihet nga landfilli i Elbasanit nuk është thjesht ndotje mjedisore, por simboli i një krimi shtetëror, i një afere monstruoze korruptive që po helmon qytetin dhe po vret çdo ditë shëndetin dhe të ardhmen e banorëve të tij.

Deklarata e plotë e Blushit:

Tymi i plehrave që vazhdojnë të digjen, duke helmuar një qytet të tërë, janë një dëshmi e gjallë e dështimit, e mashtrimit dhe vjedhjes më të madhe financiare në historinë e Shqipërisë – aferës së inceneratorëve.

Partia e Lirisë, që në vitin 2021, ka denoncuar këtë aferë me fakte dhe me prova të pakundërshtueshme në SPAK, po kështu këtë denoncim e ka bërë publikisht Presidenti i Partisë Ilir Meta edhe duke qenë President i Republikës.

Kjo që po ndodh në Elbasan është pasoja direkte e lejimit me dashje nga ana e SPAK të vijimit të një skeme mafioze të ndërtuar me firmën e Edi Ramës dhe klientëve të tij politikë dhe ekonomikë, që e shitën këtë krim si një “histori suksesi”.

Sot, në vend që të kishim një incenerator funksional që pastron dhe menaxhon mbetjet sipas standardeve, kemi një gropë që vetëm gëlltit miliona euro dhe lëshon helm për qytetarët.

Tymi që ngrihet nga landfilli i Elbasanit nuk është thjesht ndotje mjedisore, por simboli i një krimi shtetëror, i një afere monstruoze korruptive që po helmon qytetin dhe po vret çdo ditë shëndetin dhe të ardhmen e banorëve të tij, për shkak se inceneratori rezultoi një makineri gjigande hajdutërie që ende vijon të gllabërojë taksat e qytetarëve për një shërbim që nuk kryhet.

Afera e inceneratorëve është një ndër skandalet më të mëdha të këtyre 30 viteve – një aferë ku janë zhdukur qindra miliona euro nga taksat e shqiptarëve, për projekte që ose nuk ekzistojnë, ose funksionojnë vetëm për të prodhuar faturime fiktive dhe ndotje reale.

Elbasani është dëshmia më flagrante: një pseudo-incenerator që për vite të tëra ka mbuluar qytetin me tym, ndërkohë që drejtësia hesht dhe nuk guxon të marrë të pandehur ideatorin, përfituesin dhe pronarin “de facto” të inceneratorëve: Edi Ramën, që inceneratorët i ka quajtur “histori suksesi”, ai që i ka mbrojtur publikisht hajdutët, që i ka quajtur vjedhjet “folklorike”, ndërsa ka garantuar që skemat kriminale të vijojnë pa u ndalur.

Edhe sot, ndërkohë që një pjesë e rrjetit mafioz është në hetim, pagesat ndaj inceneratorëve vijojnë nga buxheti i shtetit – një tallje e papranueshme me ligjin, me qytetarët dhe me paratë e tyre.

Kjo ndodh për shkak se SPAK vijon ta cilësojë këtë aferë një krim intelektual, duke mbuluar të vërtetën, mbrojtur përgjegjësit dhe duke u fshehur si struci pas reve toksike të korrupsionit.

Në vend të përgjigjet Edi Rama për vjedhjen në mes të sheshit me aferën e inceneratorëve, prej më shumë se 9 muajsh mbahet në mënyrë të dhunshme dhe të paligjshme, në izolim ekstrem, pa fakte dhe prova Presidenti Meta sepse duhet t’i mbyllet goja denonuesit të parë të kësaj afere, ndërsa vjedhësi dhe pronari de facto i kësaj afere, Edi Rama duhet të jetë i lirë për të vijuar me vjedhjet e përbindshme, që ende vijojnë.