Boçi: Vendimi për lirimin e Berishës, nën presionin ndërkombëtar

Nënkryetari i Partisë Demokratike, Luçiano Boçi e ka konsideruar lirimin e liderit demokrat, Sali Berisha si vendim të marrë nën presionin ndërkombëtar.

Nga studio e MCN Live, Boçi deklaroi se me kthimin në liri të Berishës, ndryshon situata frymëzimi politik i votuesve të Partisë Demokratike dhe i këndvështrimit të qytetarëve në raport me të drejtën

"Vendimi për lirimin e Sali Berishës është marrë nën presionin ndërkombëtare, pasi e drejta prevalon në institucionet ndërkombëtare, më shumë se e drejta dhe e vërteta e institucioneve tona.

Ka qenë gatishmëria e Strasburgut për ta marrë në shqyrtim me shpejtësi, që gjykata jonë të reflektojë dhe masën e arrestit ta cilësojë të pavlefshme duke i dhënë liri liderit.

Kemi pasur një proces të montuar politikisht dhe jashtë çdo interpretimi ligjor dhe kushtetues, sipari i këtij debati është hapur gati 11 muaj më parë, kur Berisha me qëndrimin e tij mbrojti Kushtetutën dhe ja ku është rezultati, Kushtetuta është mbrojtur.

Ndryshon situata, frymëzimi politik i votuesve të Partisë Demokratike, i këndvështrimit të qytetarëve në raport me të drejtën dhe i parafushatës elektorale që kishte nisur me përdorimin e gjithçkaje që ka pushteti.

Sot me dhënien liri të Berishës, situata ndryshon rrënjësisht dhe ka një ngjashmëri shumë të madhe me procesin që ndodhi në Amerikë.

Ngjashmëritë janë të njëjta, nuk është se duam të bëjmë ne, por ngjajnë si dy pika uji dhe deklaratat nga përtej oqeanit kanë qenë deklarata paralajmëruese.

Dhënia sot liri për zotin Berisha është rezultat i rezistencës së tij personale dhe ekipit ligjor dhe një lloj rezultati i mosbindjes civile, se aksioni i opozitës ushtron ndikimin e vetë në politikë.

Ka një ndikim të qasjes ndërkombëtare ndaj Shqipërisë. Sot politika që drejton qeverisja, është e implikuar kokë e këmbë me krimin e organizuar, me ta ka fituar zgjedhjet.

Sot është një vendim që kemi një proces të mbajtura në shtylla të korruptuara, jo ligjore. Kemi nonsensin e funksionimit të drejtësisë.

Alarmi është që ky sistem nuk funksionon, në mënyrën si e interpretojnë njerëzit që janë në sistem", u shpreh ish deputeti.