Braktis Bashën dhe negocon me Bardhin? Reagon deputetja e Lushnjes: Besoj në një PD të bashkuar

Një ditë pas bashkimit të deputeteve të PD, pak ditë para protestës së 20 shkurtit, sot në media është përfolur se dy deputetë të Lulzim Bashës janë duke u zhvilluar negociata më të për t’iu bashkuar shumicës. 

Një nga emrat e aluduar është e deputetes së Lushnjes , Eralda Bano. Pas zërave ajo ka reaguar në FB dhe thekson se beson te PD të bashkuar, por jo në një PD e cila nuk ka në krah aleatët e saj strategjikë.

“Çdo gje që kam bere në jetën time, qoftë e mire apo e keqe, e kam bere me një sens moral dhe etik; une jam një shpirt i  lirë dhe kush më njeh e di se nuk bëj kompromise me substancën time.

E kam shprehur shumë herë dhe i qendroj fort faktit se ku ka diskutim dhe dialog konstruktiv për të mirën e përgjithshme, ka demokraci.

Falë zotit që partia të cilën unë e quaj shtëpi lejon dialogun dhe shprehjen e mendimit të lirë, sepse në të kundërt do të ofronte të njejtin diskurs politik si partia e qoftëlargut.

Çdo diskutim për funksionimin e brendshëm dhe për proceset në PD i kam ngritur për të mirën e PD dhe për asnjë motiv tjetër kurrësesi.

Që kur kam nisur rrugëtimin tim me Partinë Demokratike të Shqipërisë, kam besuar gjithmonë që vlerat njerëzore dhe drejtësia duhet të prevalojnë në çdo moment.

Jam rritur në një familje nga ato të përndjekurat politikisht dhe shpirti i paraardhësve të mi nuk i fal lehtësisht ato që ai pushtet na ka bërë.

Përgjatë gjithë këtyre viteve vazhdoj ende të besoj se vlerat njerëzore duhet të prevalojnë ndaj çdo aspekti tjetër, qoftë ky personal. Sidomos  në momente kur të bërit politikë është kthyer në një pazar i cili rëndon mbi qytetarët.

Për çdo kënd që ka dyshime se ku aderojnë vlerat e mia, di t’ju them se do jenë me të drejtën dhe me partinë e cila gjithmonë ka vendosur vlerat përmbi çdo interes personal.

Thënë kjo, koherenca ime deri më sot ka qenë absolute, duke besuar fort në atë çka përfaqësoj. Unë besoj në një PD të bashkuar por jo në një PD e cila nuk ka në krah aleatët e saj strategjik.

Si përfundim, marrë shkas nga lajmet në media, mesazhi dhe qëndrimi im është tepër i qartë”, shkruan deputetja.