‘Braktisi’ Bashën për Berishën, Floriana Garo: Vjehrra doli kundër, por s'e kam problem. Këshilla që më dha ish-kryeministri

Moderatorja e njohur Floriana Garo prej javësh u shfaq në krah të ish-kryeministrit Sali Berisha, duke e shoqëruar në foltoret e mbajtura në qytete të ndryshme të Shqipërisë.

E ftuar në emisionin “Ftesë në 5”, Garo ka treguar se si ka ndikuar ‘braktisja’ e Lulzim Bashës (në fushatën e 25 prillit ishte zëdhënëse e PD) për Sali Berishën në raportet e saj më vjehrrën.

Ajo tha se vjehrra nuk e mbështeti në angazhimin pranë Berishës për shkak të bindjeve politike, por Garo shton se nuk e ka patur problem një fakt të tillë pasi kishte suportin e të shoqit.

Garo zbuloi edhe këshillën që i ka dhënë ish kryeministri për daljet e saj në ekran.

Pjesë nga intervista:

Floriana Garo: Vjehrra ime më mori sot në telefon dhe tha më kanë marrë ata të Top Channel dhe duan një mesazh. Marrëdhëniet janë shumë të mira. Jemi të lumtur që jemi afër.

Bieta Sulo: Ka pasur diskutime për politikën?

Floriana Garo: Ka pasur diskutime sepse bindjet janë të ndryshme. Unë e di që është e djathtë, megjithatë ka tjetër mendësi sa i përket arritjes së Shqipërisë që ne dëshirojmë të kemi dhe nuk e ka përqafuar angazhimin tim por nuk e kam problem këtë gjë sepse më ka mbështetur im shoq.

Bieta Sulo: Argumenti që i ke dhënë?

Floriana Garo: Që unë e besoj këtë gjë dhe kur e besoj diçka, i futem me mish e shpirt. Nuk besoj gjëra kollaj, por kur e besoj, investohem.

Bieta Sulo: Kalimi nga Basha tek Berisha ishte e vështirë?

Floriana Garo: Jam investuar me mish e me shpirt për fushatën e PD. Jam e djathtë në bindje, por për mua PD nuk është asgjë pa liderin historik Sali Berisha. Nuk ka qenë e vështirë për mua që të kaloja nga ideja e Bashës që ishte kryetari i partisë dhe unë zëdhënësja e fushatës. Kam bërë më të mirën ashtu siç po bëj më të mirën tani me zotin Berisha. Unë e kam takuar zotin Berisha në vitin 2012 dhe kemi ruajtur marrëdhënie kortezie, por ka qenë gjithmonë këshillues dhe bashkëbisedues shumë i mirë.

Bieta Sulo: Këshilla që të ka dhënë?

Floriana Garo: Mos ji shumë agresive në emisione televizive sepse nuk përcillet mirë nga teleshikuesit. Këtë e kam mbajtur vath në vesh. Ai më ka lënë hapësirë të shprehesha e të isha vetvetja.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm