Debati me Nikollën/ Denoncimi i fortë i Berishës: Ka 50 telefonata mes Ballës dhe kriminelit të rrezikshëm

Kryedemokrati Sali Berisha ka pasur replika gjatë seancës së sotme me kryetaren e Kuvendit, Lindita Nikolla. Shkak janë bërë rezolutat e propozuara nga opozita dhe të rrëzuara në Kuvend.

Berisha ka kërkuar fjalën, gjë që nuk është pranuar nga Nikolla. Kryedemokrati ka hedhur akuza për shkelje të Rregullores, të cilat kryeparlamentarja i ka mohuar.

Sali Berisha: Nuk keni absolutisht asnjë tagër përveç mosluajalitetit të plotë të këtij parlamenti të silleni në këtë mënyrë.

Ju po shkruani rregulloren e Kuvendit, ju kryeni krim sepse po shkelni ligjin e parlamentit. Aty përcaktohet qartë se cili është qëndrimi që mbahet ndaj rezolutave. Brenda tre ditëve nga data e depozitimit, ajo shqyrtohet nga Kuvendi.

Rezoluta për krimet serbe në Kosovë ka tre javë që pret të shqyrtohet.  Parlamenti nuk është dyqani yt, ti nuk ke as konceptet më elementare. Pse ju djeg dënimi i gjenocidit serb në Kosovë?

Lindita Nikolla: E sqaruan më herët

Sali Berisha: Jo nuk është sqaruar asgjë. Nuk është sqaruar asgjë

Lindita Nikolla: Nuk i kthehemi sepse ka rëndësi çështje duhet të dalim të unifikuar

Sali Berisha: Keni shkelur ligjin

Lindita Nikolla: Asnjë shkelje ligji, duhet të kemi një rezolutë të përbashkët.

Sali Berisha: Ma hap mua mikrofonin. Ju shkelni ligjin e parlamentit

Më pas Berisha u largua nga Kuvendi dhe dha një prononcim për gazetarët. Sipas tij Parlamenti është kthyer në dyqanin e Nikollës. Berisha denoncoi lidhjet e deputetit Taulant Balla, sipas tij, me një nga anëtarët më të rrezikshëm të bandës së Elbasanit.

Kryedemokrati tha se ekzistojnë të patën 50 telefonata mes Ballës dhe Gentjan Sharrës. Ai shtoi se Sharra ka mblerë vota për PS-në, ndërsa bëri thirrje për hetimin e lidhjeve mes tyre.

“Parlamenti është shndërruar në dyqanin e Lindës. E trajton si dyqanin e vet me urdhër të Edi Rramës. Dola këtu për të denoncuar publikisht lidhjet e mëdha dhe të tmerrshme të Taulant Begos me Gentian Sharrën, njërin prej anëtarëve më të rrezikshëm të Bandës së Elbasanit.

Mes Taulant Begos dhe Sharrës ekzistojnë të patën 50 telefonata dhe qindra kilometra zbardhje të gjata të këtyre bisedave. Biseda që e faktojnë Taulant Begon anëtar të inkriminuar të bandës së famshme të Elbasanit.

Taulant Bego ka marrë përsipër, ka dhënë porosi nga më të paligjshmet dhe ka kryer detyra nga më të paligjshmet në interes të Gentian Sharrës. Pra Gentian Sharra është njeriu që ka blerë vota për anëtarin kriminel të Bandës së Elbasanit, që quhet Taulant Bego. Për PS-në dhe atë.

Ju bëj thirrje që të publikoni çdo regjistrim, çdo dokument, i cili implikon apo njëson Edi Ramën, bashkëpunëtorët e tij me Bandën e Elbasanit. Bëhet fjalë për biseda për ngjarje të shumta. Po fole me bandat, flet vetëm për krimet, nuk flet për dashuri. Ta keni të qartë këtë”, deklaroi Berisha.