Deklaratat e Ramës me fëmijët, Mustafaj: A është ky modeli i një kryeministri?

Zëdhënësi i fushatës së Partisë Demokratike, Andi Mustafaj, ka shprehur shqetësimin e tij për komentet e papranueshme dhe të papërshtatshme të Kryeministrit Edi Rama, të bëra gjatë një taikimi me nxënësit.

Në një deklaratë për media, Mustafaj e ka cilësuar këtë incident si një abuzim të hapur me fëmijët dhe një shkelje të rëndë të etikës dhe moralit, duke theksuar se sjellja e Kryeministrit, e mbështetur nga Kryetarja e Kuvendit, është një sulm ndaj themeleve morale të shoqërisë shqiptare.

Ai ka kërkuar një ndjesë publike nga Kryeministri, si dhe një hetim të plotë të ngjarjes, duke kërkuar gjithashtu një ndarje të qartë mes politikës dhe arsimit për të mbrojtur integritetin dhe dinjitetin e fëmijëve.

Deklarata e zëdhënësit të fushatës së PD, Andi Mustafaj:

Në një dalje të fundit publike, e cila u zhvillua si pjesë e një ngjarje të organizuar nga qeveria me nxënës, Kryeministri Edi Rama jo vetëm që përdori gjuhë jashtëzakonisht të papërshtatshme dhe vulgare – por shkoi aq larg sa u tha fëmijëve: ‘e keni në google po të ishit kurioz, shkruani aty Edi Rama nudo, del aty. Sa keni parë ju’.

E gjithë kjo nën miratimin me buzëqeshje të Kryetares së Kuvendit, e cila është vet nënë.

Kjo deklaratë jo vetëm që ngre pyetje serioze për gjykimin e një kreu qeverie, por është një sulm i drejtpërdrejtë ndaj themeleve morale të shoqërisë shqiptare dhe një shpërfillje për pafajësinë dhe dinjitetin e fëmijëve tanë.

Edhe më alarmuese është që drejtorët dhe mësuesit u detyruan të merrnin pjesë në këtë event. Ky nuk ishte një aktivitet edukativ apo kulturor, por një masë e inskenuar e fushatës elektorale, në të cilën institucionet shtetërore u instrumentalizuan dhe fëmijët u abuzuan politikisht.

Një kryeministër që nuk ka frikë të shfaqet në një mjedis shkollor me të tilla shenja të ndyra dhe komente vetë lartësuese nuk mund të konsiderohet një autoritet moral apo politik. Çfarë thotë kjo për një lider kur e bën lakuriqësinë e tij temë bisede me fëmijët?

Ne kërkojmë me vendosmëri:

• Një ndjesë publike nga Kryeministri ndaj nxënësve, prindërve dhe mësuesve të përfshirë;

• Një hetim të menjëhershëm nga organet e pavarura për rrethanat e kësaj ngjarje;

• Kufij të qartë midis politikës dhe arsimit për të mbrojtur fëmijët tanë;

• Respekt për dinjitetin, mirësjelljen dhe ndjenjën e përgjegjësisë në komunikimin politik.

Shqipëria ka nevojë për modele krejt të kundërta nga ato që promovon Kryeministri. Shqipëria ka nevojë për arsim, jo për indoktrinim politik. Dhe mbi të gjitha: Shqipëria duhet të mbrojë fëmijët e saj nga këto shkelje kufijsh.

#MbroFëmijët

#Asnjëfëmijëipërdorurpërpolitikë