Denoncimi: KAYO po cenon informacionet e klasifikuara dhe po kthehet në minë me sahat për vendin

Partia Demokratike ka vazhduar edhe sot denoncimin e shoqërisë KAYO. Sipas deputetit të zgjedhur, Kelvis Balliu, KAYO po cenon informacionet e klasifikuara dhe po kthehet në minë me sahat për vendin.

Sipas Balliut, një prej tre kompanive të ngritura nga Veliu, Guna Tactical, ku ai zotëron 51% të aksioneve dhe MSSC e Emiljano Dushës 49%, ka marrë për objekt furnizimin me uniforma të të gjitha strukturave të sigurisë së vendit.

Ky aktivitet, shprehet Balliu, është bërë i mundur pas një Vendimi të Këshillit të Ministrave, të firmosur nga zv.kryeministrja Belinda Balluku.

Ai thekson se një nga kriteret e VKM-së është që shoqëria shtetërore KAYO të kontribuojë në entitetin e ri tregtar me jo më pak se 20 mijë m² pasuri të paluajtshme.

Deklarata e deputetit të zgjedhur të PD, Klevis Balliu:

Partia Demokratike vijon sot me denoncimin e aferës së rrezikshme që kërcënon sigurinë kombëtare: projektin e prodhimit të armëve nga kompania shtetërore KAYO, e krijuar nga Edi Rama dhe e drejtuar nga ish-drejtori famëkeq i Policisë, Ardi Veliu.

Shoqëria KAYO e qeverisë, me procedurat e dyshimta të ndërmarra për krijimin e disa kompanive që supozohet të merren me prodhimin dhe eksportimin e nevojave të ndryshme të segmenteve të sigurisë – nga uniformat deri tek armët – po cenon informacionet e klasifikuara si dhe sigurinë kombëtare, duke afishuar në një proces shumë delikat eksponentë të cilët nuk kanë certifikimin e nevojshëm.

Kompanitë e krijuara nga Ardi Veliu në emër të pushtetit të Edi Ramës nuk plotësojnë as kriteret e vetëpërcaktuara nga Edi Rama. Kjo ndodh pasi kriteret janë të detyrueshme të vendosen, por kur afera është me bekimin e Edi Ramës ato nuk janë të detyruara të zbatohen, pasi sot primare është interesi i Edi Ramës dhe jo interesi kombëtar dhe interesi i shqiptarëve.

Një prej tre kompanive të krijuara nga Ardi Veliu, Guna Tactical, ku ai zotëron 51% të aksioneve dhe kompania MSSC e Emiljano Dushës zotëron 49%, ka marrë për objekt furnizimin e uniformave për të gjitha strukturat e sigurisë së vendit – nga Forcat e Armatosura, tek Policia e Shtetit dhe agjencitë e emergjencave.

Ky aktivitet është bërë i mundur pas një Vendimi të Këshillit të Ministrave, të firmosur nga zëvendëskryeministrja dhe ministrja e Energjisë dhe Infrastrukturës, Belinda Balluku. Përkatësisht, VKM-ja nr. 291 përcakton kritere të qarta për kompanitë private që bashkëpunojnë me KAYO, si:

• Shoqëria “KAYO’ sh.a. do të negociojë dhe do të pranojë një pjesëmarrje jo më të ulët se 40% të aksioneve në shoqërinë e përbashkët, që do të krijojë me shoqëri private, çka në rastin e shoqërisë GUNA TACTICAL është plotësuar pasi Kayo gezon plot 51% te aksioneve

• Shoqëria “KAYO’ sh.a. do të kontribuojë në entitetin e ri tregtar me pasuri të paluajtshme, në masën jo më pak se 20 000 (njëzet mijë) m², që do t’i jepen në përdorim shoqërisë së përbashkët në një nga format e parashikuara nga Kodi Civil i Republikës së Shqipërisë, pa të drejtë tjetërsimi. Këtu shpjegohet edhe ndërhyrja me forcë dhe rrëmbimi i ambienteve të News24, që njihet për denoncimet ndaj Belinda Ballukut, dhe tani VKM-ja e Belinda Ballukut i nxjerr jashtë.

• Shoqëria shtetërore “KAYO’ sh.a., gjatë procesit të negocimit, në çdo rast, siguron nga subjekti me të cilin negocion, të paktën:

a) një vlerë investimi jo më pak se 15 milionë euro në periudhën kohore prej 3 (tre) vjetësh;

b) punësimin e jo më pak se 400 (katërqind) punonjësve në periudhën kohore prej 3 (tre) vjetësh;

c) ofrimin e linjave teknologjike të prodhimit të uniformave dhe aksesorëve të tjerë, sipas nevojave operacionale të Forcave të Armatosura të Republikës së Shqipërisë dhe strukturave të tjera të sigurisë;

ç) sigurimin e rrjetit të shpërndarjes së produkteve në rast eksporti.

Këto kritere duken të paplotësuara, pasi kapitali i GUNA TACTICAL është vetëm 35 mijë euro. Si mundet të punësojë 400 qytetarë dhe me këtë buxhet si mundet të prodhojë dhe të eksportojë GUNA TACTICAL?

Pra, janë vetë kriteret e vendosura nga qeveria që janë shkelur hapur nga Ardi Veliu dhe klientela e pushtetit. Kjo aferë është provë e qartë e abuzimit dhe korrupsionit të strukturuar, që jo vetëm pasuron një grusht individësh të lidhur me Edi Ramën, por edhe cenon rëndë sigurinë kombëtare të vendit tonë.

Partia Demokratike i bën thirrje institucioneve të drejtësisë të ndërhyjnë menjëherë dhe të ndalojnë këtë projekt të rrezikshëm, i cili po i jepet në duar një njeriu me lidhje të njohura dhe të verifikuara me segmente të errëta të shoqërisë.

Ne nuk kemi iluzione se drejtësia e kapur nga Edi Rama do të reagojë, por Partia Demokratike do të bëjë gjithçka për të bërë drejtësi.

Partia Demokratike do të vazhdojë denoncimin e çdo afere të qeverisë Rama, deri në ndalimin e kapjes së shtetit dhe rikthimin e sigurisë dhe ligjshmërisë për qytetarët shqiptarë.