Deputeti italian: Sali Berisha, simbol i lirisë dhe demokracisë, Shqipëria ka nevojë për një ndryshim të vërtetë

Deputeti i Forza Italia, Maurizio Casasco, mbajti një fjalim të veçantë para komunitetit shqiptar në Brescia, ku shprehu vlerësim dhe solidaritet ndaj shqiptarëve që jetojnë dhe kontribuojnë në shoqërinë italiane. Në qendër të fjalës së tij ishte figura e Prof. Dr. Sali Berishës, të cilin Casasco e cilësoi si një nga liderët më të rëndësishëm të Evropës post-komuniste.

“Sali Berisha nuk është vetëm një ish-President dhe ish-Kryeministër. Ai është simboli i luftës për liri dhe demokraci në Shqipëri, që në vitin 1990 udhëhoqi popullin drejt përmbysjes së diktaturës,” u shpreh Casasco.

Deputeti italian kritikoi ashpër vendimin për vendosjen e Berishës në arrest shtëpie, duke e cilësuar si një akt të pastër përndjekjeje politike. Ai theksoi se në një demokraci të vërtetë, drejtësia nuk mund të shndërrohet në instrument hakmarrjeje.

Casasco: Të dashur miq,

Është me emocion dhe respekt që marr fjalën sot, mes jush – qytetarëve shqiptarë që nderoni me punën dhe dinjitetin tuaj shoqërinë italiane – për të marrë pjesë në këtë ngjarje të veçantë, në prani të një figure historike të politikës evropiane: Prof. Dr. Sali Berisha.

Sali Berisha nuk është thjesht një ish-President dhe ish-Kryeministër i Shqipërisë. Ai është një nga personalitetet më të rëndësishme të Evropës post-komuniste. Është intelektuali dhe udhëheqësi që, në vitin 1990, drejtoi popullin shqiptar drejt lirisë, duke e nxjerrë nga errësira e diktaturës dhe duke e nisur në rrugën e demokracisë dhe integrimit evropian.

Sot, 34 vjet pas atij momenti historik, atij i është mohuar padrejtësisht pikërisht ajo liri për të cilën luftoi. Ai është vendosur në arrest shtëpie – një akt që nuk mund të cilësohet ndryshe përveçse si një përndjekje politike. Në një demokraci të vërtetë, drejtësia nuk mund të kthehet kurrë në një instrument hakmarrjeje.

Por sot, Sali Berisha është sërish i lirë – jo falë mëshirës së dikujt, por falë luftës dhe dinjitetit të tij. Edhe një herë, ai ka ditur ta tejkalojë kohën e vet, dhe sot ecën krenar përkrah popullit të tij.

Pikërisht për këtë arsye jemi këtu sot: për të mbrojtur lirinë, për të mbrojtur demokracinë, për të mos qëndruar në heshtje!

Italia dhe Shqipëria ndajnë një histori të veçantë miqësie dhe bashkëpunimi. Nën udhëheqjen e Silvio Berlusconi-t, Forza Italia ndërtoi ura të forta me Partinë Demokratike Shqiptare – një partneritet që vazhdon sot me besnikëri dhe vendosmëri nën udhëheqjen e Antonio Tajani-t. Silvio Berlusconi dhe Sali Berisha ishin të lidhur me një miqësi të vërtetë personale dhe politike, dhe së bashku promovuan afrimin e Shqipërisë me Evropën dhe botën e lirë.

Në vitin 1997, pas tragjedisë së mbytjes së anijes shqiptare “Kater i Radës”, që ndodhi pas një përplasjeje me një anije luftarake italiane, ishte pikërisht Silvio Berlusconi – në atë kohë lider i opozitës – që shkoi personalisht në Bari, ku priti dhe ofroi ndihmë humanitare për mbi 100 emigrantë shqiptarë. Një gjest i madh humanizmi dhe vëllazërie që populli shqiptar nuk e ka harruar kurrë. Një simbol konkret i miqësisë midis Italisë dhe Shqipërisë, dhe i vizionit politik e njerëzor të Berlusconit, të ndarë edhe nga Sali Berisha.

Ne ndajmë të njëjtat vlera: lirinë individuale, familjen, traditën, ligjshmërinë dhe një Evropë të përbashkët si horizont të përbashkët.

Por Evropa nuk është vetëm një projekt i së ardhmes për Shqipërinë. Shqiptarët janë evropianë që në origjinë. Janë populli i Gjergj Kastriotit Skënderbeut, i cili në Mesjetë mbrojti civilizimin evropian nga kërcënimi osman, duke merituar titullin nderues “Atlet i Krishtit”. Janë pasardhësit e Papa Klementit XI Albani, i vetmi Papë shqiptar në histori. Janë vendlindja e Nënë Terezës së Kalkutës, e cila me mëshirën dhe shërbimin e saj i tregoi botës fuqinë e dashurisë së pastër. Dhe janë toka e Ismail Kadaresë, i cili me fuqinë e fjalës dhe lirinë e penës bëri që zëri i Shqipërisë të dëgjohet në gjithë Evropën.

Identiteti evropian i shqiptarëve nuk është diçka që duhet fituar – është diçka që duhet njohur. Është i rrënjosur në shpirt, në kulturë, në histori dhe në kontributin që ky popull ka dhënë në ndërtimin e vetë civilizimit evropian. Një identitet që nuk mund dhe nuk duhet më të vihet në dyshim!

Në këtë rrugëtim të përbashkët, një figurë kyçe është Bardhok Doda, koordinator i Forza Italia për komunitetin shqiptar në Itali dhe njëkohësisht përfaqësues i Partisë Demokratike në Itali. Angazhimi i tij, pasioni dhe përkushtimi i tij meritojnë falënderimet tona më të sinqerta. Ai është një urë e gjallë midis dy popujve tanë dhe dy partive tona, dhe një pikë referimi e vërtetë për mijëra qytetarë shqiptarë që jetojnë në këtë vend.

Të dashur miq,

Zgjedhjet e 11 majit përfaqësojnë një moment historik. Shqipërisë i nevojitet një ndryshim i vërtetë, një udhëheqje që frymëzon, që dëgjon, që ndërton. Ne besojmë fort se ky ndryshim përfaqësohet nga Partia Demokratike dhe nga Prof. Dr. Sali Berisha.

Në Shqipëri, votojmë për Partinë Demokratike për një të ardhme lirie dhe begatie, ndërsa këtu në Itali, ju ftoj të votoni për Forza Italia, për të vazhduar forcimin e lidhjeve të miqësisë dhe bashkëpunimit mes dy vendeve tona.

Ne besojmë në rikthimin e Shqipërisë së madhe, Shqipërisë evropiane, Shqipërisë së shpresës.

Prandaj ju ftoj me gjithë zemër: të besojmë në liri, të votojmë për ndryshimin!

Forca Partia Demokratike! Forca Prof. Dr. Sali Berisha! Rroftë liria! Rroftë miqësia Italo-Shqiptare! Rroftë Evropa e popujve dhe e historisë!

Faleminderit nga zemra të gjithëve!