Dhuna policore mbi kryetarin e partisë opozitare/ Këlliçi: Dora e Bllokut të vjetër të gjakut dhe hakmarrjes ndaj shqiptarëve

Anëtari i kryesisë së Partisë Demokratike, ka reaguar ashpër ndaj dhunës policore që u ushtrua ndaj Adriatik Alimadhit, kryetarit të Ballit Kombëtar, gjatë një aksioni të forcave të rendit në Tiranë.

Këlliçi ka akuzuar autoritetet për shkelje të ligjit dhe përdorim të dhunës, duke theksuar se ky akt është pjesë e një hakmarrjeje të koordinuar nga pushteti ndaj opozitës.

Ai ka kritikuar ashpër përfshirjen e policisë në aktivitete të lidhura me bastet sportive dhe ka theksuar se kjo ngjarje është një shembull i goditjeve ndaj liderëve të opozitës në përpjekjet e regjimit për të mbajtur kontrollin.

Deklarata e anëtarit të kryesisë së PD, Belind Këlliçi:

Policia e narko-shtetit ka hyrë dje me forcë, pa mandat, dhe në shkelje të ligjit në një mjedis privat, duke dhunuar kreun e një prej partive opozitare, z. Adriatik Alimadhi.

Pamjet janë të qarta. Policë civilë dhe me uniformë tërheqin dhe godasin një zotëri në moshë, në punën dhe pronën e vet.

Policisë iu deshën shumë orë për të dalë me variantin e vonuar dhe si zakonisht të manipuluar. Thonë se kishin shkuar për të kontrolluar lokalin e të vëllait të Alimadhit si pikë bastesh sportive. Edhe nëse kjo është e vërtetë, ata ishin aty që kompanitë e Olsit të Edit, të mos kishin konkurrencë! Sepse askush tjetër në qytet nuk mund të vërë baste pa marrë Olsi dhe Edi përqindjen.

Alimadhi është i gjashti në radhën e krerëve të partive opozitare që goditen, merren peng, arrestohen, persekutohen.

Në emër të Partisë Demokratike e dënoj me forcë këtë akt të paligjshëm, burracak, këtë dorë të zezë të pushtetit mbi çdo qytetar të lirë.

Policëve, që tregohen të fortë me qytetarët, dhe të zgërlaqur me të fortët e dosjeve të krimit, nuk janë burra por burracakë që marrin urdhëra nga nipi i Enverit dhe djali i Kristaqit.

Goditja e nacionalistit Adriatik Alimadhi dje, ishte dora e Bllokut të vjetër të gjakut dhe hakmarrjes kundër shqiptarëve të lirë.

Më 11 maj, kemi në dorë 2 zgjedhje. Narko-shtetin e Ramës që godet djathtas e majtas, për ujin, dritat, tokat e bregdetit, deri edhe bastet sportive, ose shtetin serioz që e mbron qytetarin dhe zhvillon ekonominë.

Shqipëria madhështore nuk është slogan, është polici në krah të qytetarit dhe kundër krimit, me krimineli pas hekurave, dhe jo duke u kapardisur në Bllok!