Dosjet Balluku/ Berisha: Në GJK shkoi Edi Rama sepse ai është bashkëautor në vjedhje

Kreu i Partisë Demokratike, Sali Berisha, u shpreh se denoncimet dhe përpjekjet e opozitës shqiptare janë në sinkron me ato të mediave ndërkombëtare, të cilat që nga viti 2017 e deri sot e kanë vënë Shqipërinë në qendër të vëmendjes si narkoshteti i parë dhe i vetëm në Europë.

Berisha shprehet se kjo situatë nuk është vetëm një çështje politike, por një problem kombëtar dhe ndërkombëtar, për shkak të kontrollit të tregut të drogës në Europë nga klanet shqiptare të lidhura me kartelet e Amerikës Latine dhe pasojave që kjo sjell për sigurinë dhe ekonominë e vendit.

Ai gjithashtu tha se Balluku, e pezulluar, nuk iu drejtua Gjykatës Kushtetuese, por vetë kryeministri Rama mori përsipër ta çojë çështjen në këtë institucion.

Sipas tij, ky veprim nuk lidhet thjesht me mbështetjen ndaj Ballukut, por me interesin personal të Ramës, i cili është bashkëautor në aferat e mëdha korruptive që po hetohen.

PJESE NGA DEKLARATA E BERISHES

E vërteta se përpjekja jonë apo denoncimi ynë shkon në sintoni dhe në paralel me denoncimin e mediave më serioze ndërkombëtare të cilat nga viti 2017 dhe gjer sot në dhjetëra e dhjetëra artikuj, dokumentar, analiza kanë shpallur Shqipërinë narkoshtetin e parë dhe të vetëm në Europë, mbasi Shqipëria sipas të dhënave të OKB-së është eksportuesi numër 1 në Europë dhe Shqipëria sot, klanet shqiptare të drogës të lidhura me kartelet narkoterroriste të Amerikës Latine kontrollojnë gjerësisht tregun Europian të kokainës dhe përcaktojnë çmimet e saj. 

Në rast se ju dëgjuat apo lexuat përshëndetjet sekretari i Shtetit Rubio dhe vetë presidenti i SHBA-së, Donald Trump, dërguar dje me rastin e festës së pavarësisë konstatonin se në mesazhet e tyre, problem madhor shtrohet lufta kundër organizatave kriminale, karteleve të drogës dhe bashkëpunëtorëve të tyre, të cilët në Shqipëri janë duke filluar nga kreu i qeverisë dhe vazhdim më poshtë.

Po në këtë asamble të CDI, unë pata nderin të zgjidhem zv/president i kësaj organizate gjë që përbën një vlerësim shumë të madh për PD, opozitën shqiptare. Një mbështetje për opozitën shqiptare në betejën kundër narkoshtetit. 

Por përveç kësaj, superskandali Rama-Balluku ka marrë përmasa të papara.

Të dashur miq. Për herë të parë në historinë e Europës, për herë të parë në historinë e vendeve të lira, një kryeministër padit gjykatën që pezulloi nga detyra zv/kryeministren hajdute, e padit në Gjykatë Kushtetuese. 

Nuk ka ndodhur kurrë.

Edi Rama u tha shqiptarëve se pezullimi nuk ka ndodhur ndonjëherë në Europë. E vërteta është se pezullimi nuk është i shpeshtë në Europë. Sepse në Europë sapo ngrihet një akuzë, i akuzuari jep dorëheqjen dhe pret sqarimin nga drejtësia të problemit.

Kurse në Shqipëri jo vetëm që nuk jep dorëheqjen, por merr mbështetjen e kryeministrit për të paditur në Gjykatë Kushtetuese. Pra në Gjykatë Kushtetuese nuk shkoi Belinda Balluku e pezulluara, por në Gjykatë Kushtetuese shkoi Edi Rama, por në mënyrë absolute jo tashmë për vlerësimet apo sentimentet që ka ndaj Ballukut, por fund e krye për shkak të problemit madhor të vet sepse ai është bashkëautor në këto vjedhje të mëdha.

Është ai që dërgoi Ballukun në Ankara dhe takoi kompanitë turke të cilat morën 50 mln euro më shumë për tunelin e Llogarasë sesa kompani de fakto ndërtoi tunelin, që paraqiti një ofertë 50 mln më të lirë. 

Pra kemi një kalbëzim, kemi një shkërrmoqe, kemi një rrokullisje të pashpresë të regjimit të narkoshtetit.

Ndërkohë PD ka nisur analizën e saj pas këtyre proceseve që ndodhën, pas publikimit të raportit përfundimtar të OSBE-ODIHR dhe rezolutës së miratuar në Sao Paolo të Brazilit nga CDI. 

 

ZYRA E MEDIAS DHE KOMUNIKIMIT, PARTIA DEMOKRATIKE