Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Opozitës

“Drejtësi e munguar”, Berisha: Shqiptarët presin 16 vite për një proces gjyqësor

Politiko 30 Tetor 2025, 19:53

“Drejtësi e munguar”, Berisha: Shqiptarët presin 16 vite

Kryedemokrati Sali Berisha ka akuzuar qeverinë dhe sistemin e drejtësisë për degradim total të institucioneve dhe mohim të lirive themelore të qytetarëve shqiptarë.

Nga foltorja e Kuvendit, gjatë debatit për raportin e veprimtarisë së Avokatit të Popullit, Berisha tha se “Kushtetuta është kthyer në një letër të vdekur” dhe se drejtësia në vend “ka falimentuar plotësisht”.

“Shqiptarët presin 16 vite për një proces gjyqësor. Në asnjë vend tjetër të botës nuk ekziston një situatë e tillë. Kjo është për të qarë, jo për të qeshur,” deklaroi Berisha, duke theksuar se vonesat e tejzgjatura në drejtësi kanë sjellë pasoja tragjike në shoqëri.

Sipas tij, mungesa e një procesi të drejtë gjyqësor ka çuar në 643 raste vetëgjyqësie, 180 vrasje dhe 220 plagosje gjatë viteve të fundit.

“Kjo është drejtësi që mungon, drejtësi që shtyn qytetarët drejt vetëgjyqësisë,” shtoi ish-kryeministri.

Berisha vuri në dukje se, sipas kreut të Këshillit të Lartë të Drejtësisë, afati mesatar për përfundimin e një çështjeje është shkurtuar me vetëm 16 ditë nga një vit në tjetrin një fakt që e cilësoi si “absurd dhe dëshmi të kolapsit të sistemit”.

"Të dashur qytetare dhe qytetarë.
Zonja dhe zotërinj. Sot debatojmë për raportin e veprimtarisë së Avokatit të Popullit në një vend në të cilin Kushtetuta në tërësi është një letër e vdekur, dhe të drejtat më themelore të njeriut jo të gjitha, por disa më kryesoret faktikisht janë të humbuara, janë inekzistente.
Sot me të drejtë janë trajtuar në raport, paraburgimet masive, një dëshmi e shëmtuar falimentimit të drejtësisë, një dhunim masiv i lirive dhe të drejtave të qytetarëve, një mohim i vërtetë i të drejtës së qytetarit shqiptar, për një proces të ligjshëm.
Natyrisht në këtë dramë të madhe, Avokati i Popullit ndodhet në pozicionin ‘bir Selman i nënën, cilin të qaj më parë’.
Një situatë dramatike si kjo ju garantoj se nuk ekziston sot në asnjë diktaturë në botë.
Qytetarët e një vendi kanë të drejta themelore dhe njëra prej tyre është procesi gjyqësor i drejtë. Si në asnjë vend tjetër të planetit, presin sipas zyrtarëve të këtyre institucioneve, 16 vite dhe nga vjet gjer sivjet, në fakt zonjë e nderuar, kjo është për të qarë, jo për të qeshur.
Buzëqeshja jote nuk më shqetëson, sepse buzëqeshja e njeriut duhet pranuar nuk ka të keqe, por problemi është se, kur mendoj unë që shqiptarët presin 16 vite për një proces gjyqësor, dhe kjo ka si pasojë vetëgjyqësinë.
Kur mendoj se ky mohim i kësaj të drejte ka sjellë 643 raste të regjistruara vetëgjyqësie, ka sjellë 180 vrasje, ka sjellë 220 plagosje, ka sjellë qindra vepra të tjera penale.
Kur mendoj unë se kreu i Këshillit të Lartë të Drejtësisë deklaron me përgjegjësi të plotë se nga një vit në vitin tjetër, afati 16 vjetor, është shkurtuar vetëm me 16 ditë ju garantoj se shqiptarët dhe qytetarët e botës në çdo vend, qoftë dhe në diktaturë, janë më të përfillur nga drejtësia e tyre se sa në Shqipëri. Drejtësi e munguar.
Drejtësia 16 vjet në pritje, është drejtësi që mungon, drejtësi që krijon ato shpërthime që ne pamë nga ekzekutimi publik në sallën e gjyqit të gjykatësit, që kurrë nuk pranohet sigurisht.
Pra kemi të bëjmë me mohimin e një të drejte që shqiptarët e kanë gëzuar që nga koha kur janë ndarë nga shoqëria para shtetërore.
Edhe në perandorinë otomane e kanë gëzuar, ka qenë ligji perandorak. Edhe në kohën e principatave e kanë gëzuar. Edhe gjatë diktaturës e kanë gëzuar. Sot nuk e gëzojnë dot."