Emrat e propozuar, Bylykbashi: Marrëveshja Alibeaj-Balla, i jep Ramës legjitimitet për kapjen e presidentit

Në përfundim të mbledhjes së grupit, Enkelejd Alibeaj, paralajmëroi një mbledhje nesër ku mes tyre la të kuptohej se do të ishin edhe anëtarët e ‘Rithemelimit’.

Deputeti demokrat Oerd Bylykbashi i është përgjigjur Alibeajt me një postim në Faceboook, ku shkruan se pavarësisht deklaratave të deputetit, “fjalët fluturojnë, e shkuara mbetet”, duke theksuar se në fund ajo që qëndron është marrëveshja Alibeaj-Balla, e cila i jep legjitimitet Ramës në zhjedhjen e presidentit.

Sipas Bylykbashit, Alibeaj përpiqet të ndryshojë statutin e Partisë Demokratike duke anashkaluar Kuvendin Kombëtar dhe Këshillin Kombëtar, dy organet më të larta përfaqësuese të PD. Bylykbashi thekson se Alibeaj s’ka tagër të mbledhë grupin dhe të japë propozime për emra kandidatësh,

Postimi i Bylykbashit:

Verba volant, scripta manent thonë latinët. Shqip, fjalët fluturojnë, e shkruara mbetet.

Ajo që mbetet është që marrëveshja e Alibeajt me Ballën i garanton Ramës legjitimimin e procesit të tij për kapjen e presidentit.

Marrëveshja i mundëson Ramës që në morinë e emrave të hedhur mbi tryezë, të fshehë emrin që ka planifikuar.

Marrëveshja që ka dakordësuar Alibeaj i mundëson Ramës që të sigurojë 84 mandate për kandidatin e tij që ta shesë si kandidat konsensual.

Marrëveshja i jep mundësi Ramës që të caktojë një opozitë hollesh përkundër opozitës së votës e me votat e tyre të caktojë presidentin e më tej, të ndryshojë sistemin zgjedhor, hartën e ndarjes territoriale, për të mbajtur pushtetin.

Alibeaj përpiqet të ndryshojë statutin e Partisë Demokratike duke anashkaluar Kuvendin Kombëtar dhe Këshillin Kombëtar, dy organet më të larta përfaqësuese të PD.

Alibeaj nuk ka asnjë tagër të mbledhë deputetët, të hedhë në tryezë emra kandidatësh për të legjitimuar procesin e Ramës.

Deputetët e Partisë Demokratike përfaqësojnë vullnetin e saj dhe nuk bëhen fasadë e kapjes së pushteteve prej Edi Ramës.