Farsa e ndërkombëtarizimit, Sula: 40% më pak studentë në auditore, bordi i akreditimit po fundos universitetet

Partia Demokratike ka deklaruarse universitetet, njësoj si shkollat e ciklit parauniversitar, po braktisen nga studentët.

Në një deklaratë për mediat nga selia e PD, drejtuesja e Depatamentit të Arsimit, Lili Sula shprehet se shkak për këtë situatë në të cilën ndodhen universitetet publike, është cilësia e dobët.

Sipas saj, Rama po bën propagandë me kartën e ndërkombëtarizimit, kur nuk po arrin dot të mbajë në vend të rinjtë.

Deklarata:

Ideja për një ligj të ri për arsimin e lartë, 10 vite pas ligjit nr. 80 i cili na u premtua si një epokë e re moderne, sot duhet të pranohet si një dështim i plotë dhe me të edhe përgjegjësitë politike të kësaj partie shtet që e solli dhe e rrënoi arsimin universitar.

Në kaosin e përditshëm të mohimit të së drejtës së pronës nga Thethi në Sarandë, të shkarkimit nga puna më një fjalë të vetme të gjithë drejtuesve të bashkive të vendit, vjen si për ironi raporti i Bordit të Akreditimit të institucione të arsimit të lartë, i kurorëzuar me idenë e një ligji të ri për rilindjen e dështimit.

Universiteti, studenti dhe pedagogu janë braktisur prej 2013 sepse diktaturat, siç ka dëshmuar historia kanë fobi nga dija, nga elita e shoqërisë dhe studentët.

Sot, në vitin e 13-të të qeverisjes rilindase,

– Universitetet tona nuk shfaqen në asnjë prej rankimeve ndërkombëtare dhe me rezultatet e deritanishme nuk do të përfshihen edhe për shumë vite të tjerë.

Lista e problemeve që ka nxjerrë Bordi i Akreditimit flet vetë:

– Më pak se 40% e programeve studimore janë akredituar; pjesa tjetër lëshon kartonë, jo diploma.

– Më shumë se 40% e pedagogëve janë me diplomë të nivelit Master sepse për një dekadë u mbyll doktoratura dhe universitetet u kthyen në shkolla të larta vetëm me dy cikle studimore. Rekrutimet plotësisht të kontrolluara është arsyeja tjetër që specialistë të kualifikuar me grada e tituj shkencorë të fituar edhe jashtë vendit mbeten jashtë sistemit.

– 46% e personelit akademik punojnë me kohë të pjesshme në universitete, çka e zvogëlon ndjeshëm cilësinë dhe përkushtimin.

– Autonomia institucionale dhe liritë akademike janë shkelur me këmbë – presionet, shantazhet, dhe përdorimi politik i universiteteve janë bërë norma. Prej 2015-ës kur shumica e kartonëve miratoi ligjin 80, klima e frikës, ngritjes së kulisave për të goditur figurën e pedagogut në universitete është edhe më rëndë se ajo e para viteve ’90, – politika e ka kapur botën universitare në torbën e pengjeve. Shkelet çdo kod etik e standard institucional, u bëhet presion pedagogëve dhe përdoren studentë nga ata që propagandojnë pikërisht të kundërtën.

– Themelet universitare, autonomia institucionale dhe liritë akademike nuk vlerësohen në dokumentin e Bordit të Akreditimit, nuk merret parasysh mendimi i studentëve, nuk është vlerësuar cilësia e programeve studimore krahasuar me ato europiane, impakti në zhvillimin ekonomik social të vendit, nuk bëhet vlerësim për cilësinë e menaxhimit, të llogaridhënies, transparencës, transferimit të dijeve, lidhja me tregun e punës etj.

– Ndërkohë, rektori që i gëzohet telefonatës së sunduesit si një bekim dhe nuk nguron të ndajë me botën gazmendin që i kurorëzon karrierën mbetet mishërim grotesk i kapjes së dijes nga propaganda.

– Kërkohen arritje cilësore në universitete dhe produkte shkencore pa mbështetur financiarisht kërkimin, por duke mashtruar mandat pas mandati për rritje të financimit. S’ka si të ketë cilësi në arsimin e lartë kur shteti e financon me 0,45% të PPB dhe pedagogët mbajnë ngarkesë të lartë mësimore për të rritur pagën mujore, ndërsa pjesëmarrjet në veprimtari dhe botime ndërkombëtare mbulohen financiarisht nga vetë ata.

– Laboratorët dhe bibliotekat janë simbol i mjerimit teknologjik, digjitalizimi nuk përmendet, ndërkombëtarizimi është farsë.

– U fshinë nga mendja studentët e nuk u morën aspak në konsideratë, në harresë pakti me universitetin, heshtje për plagjiaturat, për bursat e degëve prioritare pa marrë parasysh se universitetet themelohen si tempuj përçues të dijeve e në shërbim të studentëve dhe përkundrejt kësaj tabloje të zymtë u hodh teza propaganduese që studentët e huaj të studiojnë tek ne.

–  Në auditorët tanë ulen 40% më pak studentë, universitetet po u ngjajnë gjithnjë e më shumë shkollave të braktisura të ciklit parauniversitar, të zbrazëta e pa studentë. Ata largohen për të studiuar në universitete jashtë vendit, në universitete të rankuara, me zero taksë vjetore, për të fituar diploma e për të punuar në përputhje me fushën e studimit, për t’u paguar shumë mirë dhe për të siguruar cilësi jetese normale. Studentët po largohen masivisht – jo vetëm nga vendi, por sepse nuk kanë besim se dija këtu vlen. Ndërkohë, propaganda për tërheqjen e studentëve të huaj është maskë për një shoqëri që nuk po mban dot të vetët.

Në vend të një vizioni për arsimin, kemi vetëm truke për të mbuluar kolapsin real. Universiteti ka hyrë në fazën e kolapsit të plotë– jo për mungesë të potencialit, por për shkak të një regjimi që i druhet çdo burimi të lirisë dhe mendimit të lirë.

Do të ishte e shëndetshme që sunduesit të grindeshin për fronin e dijes, progresin e vendit dhe ata që drejtojnë tempujt universitarë ta mbanin në dorë fronin, por për fat të keq, në këtë vend, vetëm një patokrat sundon, ndërsa universitarët, përkundër gjithçkaje, këndojnë në kor heshtjen.