Flutura Açka i del në krah Mark Markut: S’është braktisje! Po e ndjek me trishtim skizmën psikike, poplat i ruani për “bishën”

Shkrimtarja, tashmë deputetja e zgjedhur e PD, Flutura Açka i ka dalë në krah Mark Markut, pas vendimit të publikuar një ditë më parë për dorëheqje nga mandati.

Në një postim në rrjetet sociale, Açka thotë po e ndjek me trishtim skizmën psikike që po ndodh pas dorëheqjes së Markut, pasi sipas saj i largohen thelbit të pastër të kësaj ikjeje.

Ajo e cilëson vendimin jo si një braktisje, por si një qëndrim personal, të komentueshëm, por jo i pagjykueshëm.

Postimi i plotë:

Poplat mbi Markun i ruani për bishën

“Nëse unë dhe bota nuk shkojmë mirë, botës i duhet të ndryshojë”, thotë një shprehje që shpesh më ndihmon të pranoj, se kur them një fjalë a bëj një veprim për të cilët jam e bindur se kam të drejtë, t’i shkoj atyre deri në fund.

Po e ndjek me trishtim skizmën psikike që po ndodh pas dorëheqjes së Mark Markut dhe nga të dyja anët ka nga ata që i largohen thelbit të pastër të kësaj ikjeje. Nuk është braktisje, është një qëndrim personal, i komentueshëm, por jo i pagjykueshëm, kur është fjala për njerëz me integritet si profesor Marku.

Do ta gjykoja, nëse do të gjeja dikë që t’i afrohej luftës opozitare të palodhur të tij nga jashtë detyrës politike, që do të thotë se ka qenë e drejtë, apolitike dhe e përgjegjshme.

Do ta gjykoja po ta kishte lënë në mes fushatën e vështirë të zgjedhjeve, me një kundërshtar të pabesë, të dhunshëm dhe pa principe politike.

Do ta gjykoja po të bënte sikur të mos e dinte se me çfarë dileme politike, morale, ligjore dhe etike hyn Opozita në parlament në shtator.

Marku Marku ka integritet mjaftueshëm për vete dhe ata që pësuan skizmë mentale nga ngjarja. Mjaft që të analizojnë me qetësi.

Të vetmen gje që gjykoj, është pafatësia jonë prej mungesës së një figure me personalitet të lartë në një front aq të rëndësishëm të luftës opozitare dhe personalisht mungesën e një kolegu të vyer, nga i cili ke çfarë dhe si të mësosh të bësh opozitë.

Ndaj të nxituarit e mësuar t’i gjykojnë veprimet e tjerëve nga kuti i tyre, është mirë t’i ruajnë poplat e sulmit të tyre për “bishën” e vërtetë, që është në fakt një zogori që vodhi vullnetin e shqiptarëve në zgjedhjet e fundit dhe po ua vjedh shqiptarëve çdo ditë frymën nga pak, e nga shumë.